
马尔巴大师教言集MARPA13ནཱ་རོ་ཆོས་དྲུག་གི་སྐོར།
1-1-193b
༄༅། །ནཱ་རོ་ཆོས་དྲུག་གི་སྐོར།
༄། །མཆོག་གི་གཏུམ་མོ་སྦར་བའི་མན་ངག །
བླ་མ་གྲུབ་ཐོབ་རྣམས་ལ་ཕྱག་འཚལ་ལོ། །སློབ་དཔོན་ཆེན་པོ་ན་རོ་པས། །གསང་སྔགས་རྒྱལ་པོ་ཡི་གེ་བདུན། །འབུམ་ཕྲག་གཅིག་ཏུ་བཟླས་བྱས་ནས། །ས་ནི་གཡོས་ཤིང་ལུང་བསྟན་ཐོབ། །ཤར་ཕྱོགས་ངོས་ཀྱི་ཏཱེ་ལོ་པ། །ཞལ་སྔར་གདམས་པ་མནོས་པ་ནི། །དངོས་པོའི་གནས་ལུགས་ལམ་དང་ནི། །འབྲས་བུ་སྐྱེ་བའི་རིམ་པའོ། །དེ་ཡང་གསང་བ་འདུས་པ་ལས། །འོད་གསལ་བ་ལས་སྟོང་པ་ཆེ། །དེ་ལས་ཐབས་ནི་སྣ་ཚོགས་འབྱུང་། ཞེས་པས། དངོས་པོའི་གནས་ལུགས་གཉིས་ཡིན་ཏེ། ལུས་དང་སེམས་སུ་ཤེས་པར་བྱ། །ལུས་ཀྱི་གནས་ལུགས་མ་ཤེས་ན། །སྒོམ་པའི་གནད་མི་ཤེས། སྒོམ་པའི་གནད་མི་ཤེས་ན། སེམས་མི་ཟིན་པས། །དེས་ན་ལྟེ་བ་སྤྲུལ་པའི་
1-1-194a
འཁོར་ལོ་ན་སྐྱེ་བ་མེད་པ་མཚོན་པའི་ཡི་གེ་ཨ་གནས། དེ་ལས་སྐྱེ་བ་མེད་པ་མཚོན་པའི་རྩ་ཨ་བ་དྷུ་ཏི་བྱུང་། ཡར་ན་ཚངས་པའི་བུ་གར་ཟུག །མར་ན་གཉེར་པོ་ཆེར་ཟུག །རྐྱང་མ་རོ་མ་གཉིས་ཡར་ན་སྣ་སྒོར་ཟུག །མར་སྣེ་སྤུ་ནེ་གུའི་འཚམས་(མཚམས་)སུ་ཟུག །གདུགས་དང་གདུགས་ཤིང་ལྟ་བུར་གནས་ཏེ། འཁོར་ལོ་བཞི་དང་བཅས་པར་བསྒོམ། །དེ་ཡང་ལུས་ནི་བྱང་ཆུབ་རྣམ་ལྔ་དང་། །རྩ་དང་བྱང་ཆུབ་སེམས་དང་ནི། །མི་གཙང་རྫས་དང་རྣམ་རྟོག་གིས། །ལུས་ཀྱི་ཆོས་ནི་གནས་པ་ཡིན། །ཞེས་པ་དང་། སེམས་ཀྱི་གནད་མ་ཤེས་ན་སྒོམ་རྒྱུའི་དོན་མི་ཤེས། དེ་ཤེས་ན་སྐུ་ལྔ་རང་ཆས་སུ་གནས་སོ། །སེམས་ཀྱི་གནས་ལུགས་བསྟན་པ་ནི། །ཀྱེ་ཧོཿ འདི་ནི་རང་གི་རིག་པ་སྟེ། ངག་གི་སྤྱོད་ཡུལ་ལམ་ལས་འདས། །ཏཱེ་ལོ་ང་ཡིས་ཅི་ཡང་བསྟན་དུ་མེད། །རང་གིས་རང་ཉིད་མཚོན་ཏེ་ཤེས་པར་བྱོས། །ཏཱེ་ལོ་པའི་ཆོས་དྲུག་ལ། མི་མནོ། མི་བསམ། མི་སེམ(སེམས)། མི་སྒོམ། མི་དཔྱད། སེམས་རང་བཞིན་དུ་གནས་པའོ། །དེ་ལ་ལམ་གྱི་རིམ་པ་ལ། །གནད་ནི་རྣམ་པ་གསུམ་ཡིན་ཏེ། །ལུས་དང་ཡུལ་དང་དུས་དང་ངོ་། །ལུས་ནི་རྡོ་རྗེ་དཀྱིལ་མོ་དཀྲུང་། །རྒལ་ཚིགས་རིན་ཆེན་{བཙར་}ལ་བརྒྱུས། །ཐོང་ཀ་རྒྱུན་དུ་ཡངས་པར་བྱ། །གཏོང་མགོ་ཤིན་ཏུ་སྦ་བར་བྱ། །ལྕེ་ནི་ཡས་རྐན་ཉིད་དུ་གཏད། །མཉམ་བཞག་ཕྱག་རྒྱ་ལྟེ་བའི་འོག་ཏུ་བཙིར་བར་བྱ། །ཡང་ན་ལུས་ནི་ཙོག་པུར་བསྡད། །རེའུ་མིག་བཞིན་དུ་བསྣོལ་བར་བྱ། །རྒྱ་མདུད་བཞིན་དུ་བསྡུམ་པར་བྱ། །ལྕགས་ཀྱུ་བཞིན་དུ་དགུག་པར་བྱ། །བུམ་པ་བཞིན་དུ་དགང་བར་བྱ། །མདའ་ལྟར་གྱེན་དུ་འཕང་བྱས་པས། །ནམ་མཁའི་བ་ནི་རིམ་ཀྱིས་བཞོ། །ཡང་ན་ཨོལ་ཀོས་ཨོལ་མདུད་མནན། །ཡང་ན་འཇིང་པས་ལྟག་པ་མནན། །གཡས་ནས་རྒྱུ་ན་གཡས་རྩ་མནན། །
1-1-194b
གཡོན་ནས་རྒྱུ་ན་གཡོན་རྩ་མནན། །ཕོ་རླུང་གདུལ་ཞིང་མོ་རླུང་སྦྱང་། །མ་ནིང་རླུང་ལ་རྒྱུན་དུ་བསྒོམ། །དེ་ཡང་རྡོ་རྗེ་དཀྱིལ་དཀྲུང་རྫོགས་སངས་རྒྱས། །ཞེས་པ་དང་། ཡང་གདན་བཞི་ལས་ལུས་སེམས་སྲོག་གི་དབྱུག་པ་ལས་སྦྱོར་བ་དྲུག་གིས་མན་ངག་གནས། །ཐབས་དང་བཅས་ན་ཤིན་ཏུ་འབར། །ཞེས་སོ། །དབུགས་ལ་སྦྱོར་བ་བཞི་ལྡན་བྱ། །དབུགས་ཀྱི་བཞི་ལྡན་མ་ཤེས་ན། །གོང་གི་ཡོན་ཏན་འབྱུང་བར་དཀའ། །དེ་ཡང་རྡོ་རྗེ་མཁའ་འགྲོ་ལས། དགང་བ་ཡིས་ནི་ལུས་བཀང་ན། །དུག་དང་རིམས་ཀྱི་ཚ་བ་འཕྲོག །བུམ་པ་ཅན་གྱི་སྒོ་བཅིངས་ན། །སྒོ་ཡི་བུ་ག་དག་པར་འགྱུར། །འཐོར་བ་སྣ་ཚོགས་རྡུལ་དུ་བྱ། །རབ་ཏུ་ཞི་བས་ཞི་བར་འགྱུར། །སེང་གེ་རྣམ་གྲོལ་ཕྱག་རྒྱ་ཡིས། །རྣལ་འབྱོར་པ་ཡིས་བཅིངས་ནས་སུ། །རྟག་ཏུ་སྲོག་དང་བརྩོལ་(བརྩལ་)བར་བྱ་ཅེས་(ཞེས་)སོ། །ཧེ་བཛྲ་ལས། རྡུབ་པ་ཡིས་ནི་དབང་དུ་བྱེད། །དགང་བ་ཡིས་ནི་རེངས་པར་བྱེད། །ཞི་བ་ཡིས་ནི་ཞི་བར་འགྱུར། །ཞེས་དང་། མཉམ་པ་མ་རུངས་དཔྲལ་བ་ཅན། །དྷུ་ཏིར་ཙུད་(ཚུད་)ན་བྱང་སེམས་རྒྱུན་མི་འབབ། །ཅེས་(ཞེས་)སོ། །ཡུལ་གྱི་གནད་ནི་གཉིས་ཡིན་ཏེ། ཕྱི་རོལ་དུ་སྣང་བ་དཀར་དམར་ཡུལ་གྱི་གནད། །རིག་མ་མཚན་ལྡན་ཡུལ་གྱི་གནད། །ནང་གི་འཁོར་ལོ་བཞིར་གཏད་དེ། །ལྟེ་བ་སྤྲུལ་སྐུར་དགའ་བཞི་སྐྱེ། །དེ་ཡང་རིམ་ལྔ་ལས། ལྟེ་བ་ཆུ་སོ་འཚམས་(མཚམས་)འཁོར་ལོ། །གྲུ་གསུམ་དཀར་ཞིང་དམར་བ་ལ། །ཐིག་ལེ་ཁ་དོག་ལྔ་བསམ་སྟེ། །སངས་རྒྱས་ལྔ་རུ་མཚོན་པར་བྱ། །སྲོག་འགོག་པ་དང་ལྡན་བྱས་ན། །སྐད་ཅིག་དེ་ལ་འབར་འགྱུར་ཏེ། །འཇིག་རྟེན་ཁམས་རྣམས་མཆོད་པའི་གནས། །རྡོ་རྗེ་འཛིན་པ་ཉིད་དུ་འགྱུར། །ཞེས་སོ། །དུས་ཀྱི་གནད་ནི་བཞི་ཡིན་ཏེ། ཐ་མལ་དུས་སུ་ལུས་ཀྱི་ལྟེ་བར་སེམས་ཀྱི་རྒྱལ་པོ་གནས། །དེར་གཏད་ན་ལུས་ཐམས་ཅད་ཀྱི་
1-1-195a
གནད་དུ་བདེ་བ་སྐྱེ། སྙོམས་འཇུག་གི་དུས་སུ་བདེ་ཆེན་དུ་གཏད་ན་ལུས་ཐམས་ཅད་དུ་ཁྱབ་པའི་བདེ་བ་སྐྱེ། གཉིད་ཀྱི་དུས་སུ་སྙིང་ཁར་(གར་)གཏད་ན་ལུས་ཀྱི་གནད་ཐམས་ཅད་དུ་མཆོག་དགའ་སྐྱེ། གཉིད་ལོག་དུས་སུ་མགྲིན་པར་གནས་ཏེ་དགའ་བྲལ་གྱི་དགའ་བ་སྐྱེ། །ཡུལ་ནི་འཁོར་ལོས་སྒྱུར་རྒྱལ་འདྲ། །དེ་ཡང་གདན་བཞི་ལས། ལྟེ་བོར་ཆུ་ཤིང་སྙེ་མ་གནས། །སྙིང་ཁར་(གར་)ཡང་ནི་འགྲེང་སྟེ་གནས། །རྟག་ཏུ་སྟོང་པའི་སྒོ་ཡིན་ཏེ། །མཁས་པས་རྟག་ཏུ་བཟློག་པར་བྱ། །བསྒོམ་དང་བཟླས་པའི་བདག་ཉིད་ཁྱད་པར་ཀྱིས(གྱིས)། །གང་གི་ལམ་ནས་ཞུགས་གྱུར་ན། །འགྲུབ་འགྱུར་འདི་ལ་ཐེ་ཚེམ་མེད། །ཅེས་(ཞེས་)སོ། །འབྲས་བུ་སྐྱེ་བའི་རིམ་པ་ནི། མཆོག་དང་ཐུན་མོང་གཉིས་ཡིན་ཏེ། ཐུན་མོང་རིམ་པ་བསྟན་པ་ནི། །དང་པོ་དྲོ་བ་ལྟ་བུ་འབྱུང་། །གཉིས་པ་བདེ་བ་ལྟ་བུ་འབྱུང་། །གསུམ་པ་མི་རྟོག་སྐྱེ་བར་འགྱུར། །དེས་ནི་རྣམ་རྟོག་ཤུགས་ཀྱིས་འགོག །དུ་བ་སྨིག་རྒྱུ་སྲིན་འབུ་མེ་ཁྱེར་དང་། །སྐྱ་རེངས་ཤར་བ་ལྟ་བུ་དང་། །ནམ་མཁའ་སྤྲིན་དག་ལྟ་བུ་འབྱུང་། །དེ་ཡི་རྐྱེན་གྱིས་ཨ་བ་དྷུ་ཏིར་རླུང་ཚུད་ནས། །རྣམ་པར་མི་རྟོག་པའི་ཡེ་ཤེས་རྒྱུན་དུ་ཤར་ཏེ། མཆོག་གི་དངོས་གྲུབ་ཐོབ་ནས་སྐྱེ་བ་འདིས་སངས་རྒྱའོ། །མཆོག་གི་གཏུམ་མོ་སྦར་བའི་མན་ངག་རྫོགསྷོ།། །།ཏཱི་ལོ་པས། ནཱ་རོ་པ་ལ། དེས་མར་པ་ལ། དེས་རྔོག་ལ། དེ་གཉིས་ཀྱིས་མིད་ལ་ཐོས་པ་དགའ་ལ་གདམས་སོ། །ཏི་ལོ་པས་མཆོག་གི་དངོས་གྲུབ་ཐོབ། །ནཱ་རོ་པས་ཐུན་མོང་གི་དངོས་གྲུབ་ཐོབ། །བླ་མ་མིད་ལ་མཁའ་འགྲོ་མས་བྱིན་གྱིས་བརླབས། གྲུབ་ཐོབ་བརྒྱུད་པའི་གདམ་ངག་རྫོགས་སྷོ།། །།
༄། །རྡོ་རྗེའི་ཚིག་གི་མདུད་འགྲོལ།
༄། །བླ་མ་རིན་པོ་ཆེ་ལ་ཕྱག་འཚལ་ལོ། །རྗེ་བཙུན་ནཱ་རོ་པཎྜི་ཏ་ནས་བརྒྱུད་པའི་གདམ་ངག །ཁུངས་སྙན་རྒྱུད་(བརྒྱུད་)གདམས་
1-1-195b
ངག་ཏུ་བཀྲོལ་ཏེ་བཤད་པ་ནི། ལུས་སེམས་སྲོག་གི་དབྱུག་པ་ལ། །སྦྱོར་བ་དྲུག་གི་མན་ངག་གནས། །ཐབས་དང་བཅས་ན་ཤིན་ཏུ་འབར། །བྱ་བ་དེ་ཚོ་ལ། གཞི། ལམ། འབྲས་བུ་གསུམ་སྟོན་ཏེ། དེ་ལ་དང་པོ། །ལུས་སེམས་སྲོག་གི་དབྱུག་པ་ལས། ཟེར་བས་ལུས་སེམས་དངོས་པོའི་གནས་ལུགས་ཡིན་ཏེ། ལུས་བྱས་པས་ལུས་དངོས་པོའི་གནས་ལུགས་ནི། དང་པོ་ཆགས་པ་ཐབས་དང་ཤེས་རབ་གཉིས་སུ་མེད་པར་ཆགས། བར་དུ་གནས་པ་ཐབས་དང་ཤེས་རབ་གཉིས་སུ་མེད་པར་གནས། ཐ་མ་འཆི་བ་ཡང་ཐབས་དང་ཤེས་རབ་གཉིས་སུ་མེད་པར་འཆི་བའོ། །སེམས་དངོས་པོའི་གནས་ལུགས་ནི་རིགས་པ་དང་སྟོང་པ་དབྱེར་མེད་དུ་གནས་ཏེ། རང་བྱུང་ལྷན་ཅིག་སྐྱེས་པའོ། །དེ་ལ་འདིར་ལུས་གནད་དུ་བསྣུན་པས་ཡེ་ཤེས་འཆར་བར་སྟོན་པས། གནད་དུ་བསྣུན་པའི་གནས་དངོས་ནི། སྲོག་གི་དབྱུག་པ་ལས་བྱ་བ་འདི་ཉིད་ཡིན་ཏེ། ཐོག་མར་མའི་མངལ་དུ་བར་དོ་མའི་སེམས་ཞུགས་པ་ལས། སྲོག་གི་རླུང་རྟེན་ཟླ་ཉིའི་དབུས་སུ་ཨ་ཡི་གཟུགས་སུ་གནས་པ་ནི་སྲོག་ཡིན་ལ། དེ་ལས་རྩ་དབུ་མ་ཚངས་པའི་དབྱུག་པ་ལྟར་ཤིན་ཏུ་དྲང་པོར་ཆགས་པ་ལས། ཡེ་ཤེས་འཆེ་བོ་རང་སའི་ཡོན་ཏན་མངོན་ཤེས་ཕྲ་མོ་དང་བཅས་པ་ནི་སྲོག་གི་གནས་རྩ་དབུས་མ་ཚངས་པའི་དབྱུག་པའོ། །དེ་ནས་སྲོག་གི་ནུས་པས་རྩ་རྣམས་རིམས་ཀྱིས་འཕེལ་ཏེ། སྐྱེ་བ་ལ་ཕྱོགས་པ་ན་གསུམ་འཚོགས་(ཚོགས་)ཀྱི་ཁ་སྦྱོར་ཞིག་སྟེ། ཐིག་ལེ་དམར་པོ་ཨ་དང་། དཀར་པོ་ཧཾ་གི་གཟུགས་སུ་གནས་དབུས་མའི་འོག་དང་སྟེང་དུ་སོང་། སྲོག་བརྩོལ་(རྩོལ་)གྱི་རླུང་སྣ་བུག་གཉིས་ནས་རྒྱུད་པས་གཟུང་འཛིན་རོ་རྐྱང་ཞེས་བྱ་སྟེ་དོན་འདྲའོ། །དེ་གཉིས་ནས་ལམ་བྱུང་ནས་སེམས་འཁོར་ལོ་བཞི་ལ་རེ་མོས་ཀྱིས་གནས་པས། རྣམ་རྟོག་འབའ་ཞིག་
1-1-196a
ཏུ་སོང་སྟེ་འཁྲུལ་ཞིང་སྡུག་བསྔལ་བ་སྟེ། རྩ་མདུད་པ། ཐིག་ལེ་སྙིགས་ན། རླུང་ཕྱི་ནང་རྒྱུ་བའི་ལས་དང་བཅས་ཤིང་རང་རྒྱུད་པར་རེངས་པའོ། །དེ་ཡི་དུས་སུ་ཡང་རང་བཞིན་གཉུག་མའི་རྩ་ཨ་བ་དྷུ་ཏི་ན་ཚངས་པའི་དབྱུག་པ་ལྟར་གནས་ཏེ། དཔེར་ན་སྦ་ལྕག་གཞོན་ནུ་ལྟ་བུ་ཡིན་ནོ། །སྲོག་དང་སྲོག་གི་རྟེན་རང་བཞིན་གནས་པའི་རླུང་དང་ཐིག་ལེ་ཡང་བདེ་གསལ་མི་རྟོག་པའི་ཡོན་ཏན་བག་ལ་ཞ་བར་གནས་ཏེ། ཤིང་ལ་མེ་དང་། རྡོ་ལ་ནོར་བུ་ལྟར་གནས་པ་སྟེ། ཏཱི་ལོ་པའི་ཞལ་ནས་ཏིལ་ལ་མར་གྱིས་ཁྱབ་པ་ལྟར་གསུངས་སོ། །དེ་ལ་གནད་དུ་བསྣུན་པའི་ཐབས་ནི། སྦྱོར་བ་དྲུག་གི་མན་ངག་གནས། ཟེར་བས། ལམ་གྱི་རིམ་པ་སྦྱོར་བ་དྲུག་གིས་གདམས་ངག་ཉམས་སུ་ལེན་དགོས་ཏེ། སྦྱོར་བ་དྲུག་ནི། ལུས་ཀྱི་རྩའི། དམིགས་པའི་རླུང་གི། དུས་ཀྱི། ཉམས་ཀྱི་སྦྱོར་བ་དྲུག་གོ། །དང་པོ་ལུས་ཀྱི་སྦྱོར་བ་དྲུག་ནི། རྐང་པ་རྡོ་རྗེ་སྐྱིལ་དཀྲུངས་ལ་སོགས་པ་རྣམས་སོ། །རྩ་ཡི་དྲུག་ནི། རྩ་ཡི་ངོ་བོ། ངེས་ཚིག །དབྱེ་བ། གནས། བྱེད་ལས། གནད་དུ་བསྣུན་པའི་ཐབས་དང་དྲུག་གོ། །རྩའི་ངོ་བོ་ལ་གཉིས། དམིགས་རྟེན་གྱི་རྩ་དང་། རང་བཞིན་གཉུག་མའི་རྩའོ། །དམིགས་པའི་རྟེན་གྱི་རྩ་ནི། །ལུས་ཁོང་སྟོང་གི་ནང་ན་ཡར་ཨ་བ་དྷུ་ཏི་རོ་རྐྱང་གསུམ་ལ་དམིགས་ལ་གཏོད་པའོ། །རང་བཞིན་གཉུག་མའི་རྩ་ནི། ཨ་ཝ་དྷུ་ཏིའི་ནང་ནི་ཡར་རྟ་རྔ་རྒྱར་གཤགས་པའི་ཆ་ཙམ། དབྱིབས་ཁ་དོག་དང་བྲལ་བ། ངོས་བཟུང་གང་དུ་ཡང་མེད་པ་ཅིག་(ཞིག་)གནས་ཤེས་གཞུང་དུ་བསྟན་ཚོད་དེ་ཡིན་ཀྱང་། ཚོགས་བཤད་ཡིན་སློབ་མ་ལ་སྔར་གྱི་རང་ཡིན་ནོ། །ངེས་ཚིག་ནི་གཟུགས་ཀྱི་ཕུང་པོ་ཆགས་པའི་ཐོག་མར་ལྟེ་བའི་རྩ་མདུད་གྲུ་གསུམ་ནས་རིམས་ཀྱིས་ཆགས་པའི་རྩ་བ་ཡིན་པ་
1-1-196b
དང་། འཁོར་འདས་ཀྱི་བག་ཆགས་རྩ་མདུད་དུ་མི་གཅིག་གནས་པར་རླུང་སེམས་ཞུགས་ནས་སྐྱོན་ཡོན་སྣ་ཚོགས་པ་གཅིག་སྐྱེད་པའི་རྩ་བ་བྱེད་པས་ན་རྩ་ཞེས་བྱའོ། །རྩའི་དབྱེ་བ་ནི། རྩ་གསུམ་ལས་འཁོར་ལོ་བཞི་དང་། དེ་ལས་རྩ་འདབ་བརྒྱ་ཉི་ཤུ་དང་། སྟོང་ཕྲག་བདུན་བཅུ་རྩ་གཉིས་ཆགས་སོ། །རྩའི་གནས་ནི་ཨ་ཝ་དྷུ་ཏི་ཚངས་བུག་ནས་ནོར་བུའི་སྒོའི་བར་དུ་རྒལ་ཚིགས་ཀྱི་གདོད་ན་ཡར་གནས་ཤིང་། རོ་རྐྱང་གཉིས་སྟེང་དུ་སྣ་བུག་གཉིས་དང་འོག་གི་སྒོ་གཉིས་ལ་ཟུག་ནས་འདབ་གཡས་གཡོན་ན་ཡར་གྱེས་ནས་གནས་སོ། །དེ་ཡང་མི་སྒོམ་ཙམ་ན་སེར་པོ། །བསྒོམས་(སྒོམ་)ཙ་ན་དམར་པོར་གནས་སོ། །བྱེད་ལས་ལ་གཉིས་ཏེ། རོ་རྐྱང་ནས་གཟུང་འཛིན་གྱི་རླུང་བརྒྱུས་པས་རྣམ་རྟོག་ཏུ་ཤོར་ནས་འཁོར་བའི་ཁམས་སད་པར་བྱེད་ལ། རླུང་གཉིས་ཨ་ཝ་དྷཱུ་ཏིར་ཚུད་ན་ཡེ་ཤེས་རྟོགས་པར་བྱེད་པའོ། །གནད་དུ་བསྣུན་པའི་ཐབས་ནི། དེ་ལྟར་རྒྱུ་བའི་རླུང་ཕྱི་ནང་དུ་འགྲོ་བ་བྲལ་ནས་གནས་ན་རྣམ་རྟོག་གི་རྒྱུ་བ་འཆད་པས། རྩ་ལ་གནད་དུ་བསྣུན་ནས་རླུང་བཟུང་། །རླུང་མེ་ཡིན་དྲོད་ཅན་གྱིས་ཐིག་ལེ་དངས་པས་རྩ་འདུད་(མདུད་)གྲོལ་བས་ཡེ་ཤེས་འཆར་བར་བྱའོ། །དེ་ཚོ་རྩའི་སྦྱོར་བ་དྲུག་གོ། །དམིགས་པའི་སྦྱོར་བ་དྲུག་ནི། གཏུམ་མོ་ཨ་ཐུང་ལ། རྩུབ་ཤིང་མེའི་འཁོར་ལོ་ལ། བདེ་བའི་གཏུམ་མོ་ལ། སྣང་བ་དཀར་དམར་ལ། གཏུམ་མོ་འབར་འཛག་ལ། ཕྱག་རྒྱ་ཆེན་པོ་ལ་བརླབ་པ་དང་དྲུག་གོ། །དེ་ལ་གཏུམ་མོ་ཨ་ཐུང་ལ་བསླབ་པ་ནི། ལྟེ་བའི་འོག་སོར་བཞི་གཅལ་བའི་ས་ན་ཡར་ལ། མེ་ཁ་དོག་དམར་བ། རེག་བྱ་ཚ་བ། རྩེ་མོ་རྣོ་བ། མྱུར་ཞིང་གྲིམས་པ། རིང་ཐུང་སོར་བཞི་པ་ཅིག་(ཞིག་)ལ་དམིགས་པ་གཏད་པའོ། །དེ་ལ་རིག་པ་མི་གནས་པར་འཕྲོ་ན། རྩུབ་ཤིང་མེ་ཡི་འཁོར་ལོ་ལ་བསླབ་པ་ནི། ལྟེ་བའི་མེ་དེ་སོར་བརྒྱད་དུ་བསྲིངས་ལ། བསྲིངས་
1-1-197a
པའི་སོར་བཞི་པོ་དེ་མེ་འགལ་བསྐོར་བ་བཞིན་དུ་བསམ་པའོ། །དེ་ལ་སྟོང་ཤས་ཆེ་སེ་བ་ཅིག་(ཞིག་)བྱུང་ན། བདེ་བའི་གཏུམ་མོ་ལ་བསླབ་པ་ནི། ལྟེ་འོག་སོར་བཞིའི་གནས་དེར། མེ་ནས་ཙམ་ཅིག་གི་སྟེང་དུ། ཐིག་ལེ་དམར་པོ་སྲན་མ་ཙམ་ཅིག་གི་སྟེང་དུ་དཀར་པོ་དེ་ཙམ་ཅིག་བསམ་ལ། དེ་གཉིས་སྙོམས་འཇུག་གི་ཚུལ་དུ་འདར་ཕྲི་ལི་ལི་ཡོད་པར་བསམ་པའོ། །དེ་ལ་བདེ་བ་ཤས་ཆེ་བའི་རིག་མ་ཐིབ་བེ་བ་ཅིག་(ཞིག་)བྱུང་ན། སྣང་བ་དཀར་དམར་ལ་བསླབ་པ་ནི། མདུན་གྱི་ནམ་ཐད་ཀར་ཤིང་བུ་འམ་རྡེའུ་ལ་སོགས་པ་གང་སྣང་བ་ཅིག་(ཞིག་)ལ་དམིགས་པ་གཏོད་པའོ། །དེ་ལ་བདེ་ཤས་ཆུང་ངེ་བ་ཅིག་(ཞིག་)བྱུང་ན། གཏུམ་མོ་འབར་འཛག་ལ་བསླབ་པ་ནི། ལྟེ་བའི་མེ་དེ་ན་ར་ར་བྱུང་ནས་སྤྱི་བོའི་ཧཾ་ལ་རེག་ལ་ཁད་བྱུང་བས། ཧཾ་ཞུ་ནས་ཐིག་ལེ་དཀར་པོ་སྲན་མ་ཙམ་ཅིག་འཐིགས་པ་དང་། ཡང་མེད་དེ་སྟུངས་རྩེར་སོང་བར་སེམ་(སེམས་)པའོ། །དེ་ལ་བདེ་སྟོང་ཆ་སྙོམས་པ་དང་། ཕྱག་རྒྱ་ཆེན་པོ་ལ་བསླབ་པ་ནི། རླུང་སེམས་དྷུ་ཏིར་བཙུད་ལ་སེམས་མ་བཅོས་པའི་ངང་དུ་ལྷོད་ཀྱིས་གློད་ལ་བཞག་པའོ། །རླུང་གི་སྦྱོར་བ་དྲུག་ནི། བརྟག་པ་དང་། མཉམ་པ། རྔུབ་པ། དགང་བ། གཞིལ་བ། མདའ་ལྟར་འཕང་པ་དྲུག་གོ། །དེ་ལ་དང་པོ་རླུང་བརྟག་པ་ནི། གཏུམ་མོ་སྒོམ་པའི་དུས་སུ། སྣ་བུག་གང་ནས་རྒྱུ་བལྟས་པ། མཉམ་པར་རྒྱུ་ན་མགོ་བརྩམ་མོ། །ཡོན་པོ་ཆ་མི་མཉམ་པ་མཉམ་པ་ནི། གཡས་ནས་རྒྱུ་ན་ལག་པ་གཡོན་པའི་ཁུ་ཚུར་གཡས་པའི་མཆན་འོག་ཏུ་བཅུག་ནས། ངོས་དེ་ཕབ་ནས་ཉལ་བས། རླུང་སྣ་བུག་གཡོན་ནས་འོང་ངོ་། །གཡོན་ནས་རྒྱུ་རྣ་ཡང་དེ་བཞིན་དུ་བྱའོ། །དེ་ནས་མཉམ་དུ་རྒྱུ་བ་དང་བསྒོམ་མོ། །རྔུབ་པ་ནི། རླུང་ཁྲུ་གང་ཙམ་ནས་ནང་དུ་རྔུབ་པའོ། །དགང་བ་ནི། རླུང་གཡས་གཡོན་གཉིས་ན་མར་སོང་བས། དྷུ་ཏིར་སིབ་ཀྱིས་སོང་བར་སེམས་ཞིང་། ལྟེ་འོག་ཏུ་ལྷན་བཏང་ལ་ཁ་སྦྱར་
1-1-197b
ཏེ་རོ་སྟོད་སེང་བྱེད་པའོ། །གཞིལ་བ་ནི། དེ་ལ་མི་ཐུབ་པ་འདྲ་ན་ནང་དུ་རྔུབ་ཙམ་ཅིག་བྱ། ཡང་མ་ཐུབ་པ་དང་སེ་གོལ་རྟོག་པའི་ཡུན་ཙམ་ཅིག་བཏང་ལ་ལྷག་མ་ནང་དུ་རྔུབས་ལ་ཐུབ་ཚད་བཟུང་བའོ། །མདའ་ལྟར་འཕང་བ་ནི། དེ་ནས་མི་ཐུབ་ན་སྤྱི་བོ་ཚངས་པའི་བུ་ག་ན་ཡར་སྔོ་ཕྱུར་སོང་བར་སེམ་(སེམས་)ཞིང་། ནང་དུ་ཐེན་ལ་ཕྱིར་ནར་བཏང་བའོ། །དུས་ཀྱི་སྦྱོར་བ་དྲུག་ནི། རླུང་དྷུ་ཏིར་ཚུད་པའི་དུས་དྲུག་ཡིན་ཏེ། གཉིས་སྦྱོར་གྱི་ཐིག་ལེ་འབབ་པའི་དུས། ཞེ་སྡང་དྲག་པོ་སྐྱེས་པའི་དུས། གཉིད་འཐུག་པོ་འམ་ར་རོ་བའི་དུས། མིག་གཟུགས་ཀྱིས་ཚིམ་པའི་སྐད་ཅིག་གི་དུས། བརྒྱལ་བའམ་འཆི་བའི་དུས། ཕྱི་ནང་གི་གཟས་ཟིན་རླུང་འཕོ་འཚམས་(མཚམས་)ཀྱི་དུས་དང་དྲུག་གོ། །དེ་རྣམས་ཀྱི་དུས་སུ་ཡེ་ཤེས་ངོས་ཟིན་སླ་བས་གནད་དུ་བསྣུན་པར་བྱ་བའོ། །ཉམས་ཀྱི་སྦྱོར་བ་དྲུག་ནི། ཐུན་མོང་པ་གསུམ། ཐུན་མོང་མ་ཡིན་པ་གསུམ་སྟེ་དྲུག་ལས། ཐུན་མོང་པ་གསུམ་ནི། ལུས་ཉམས། ངག་ཉམས། སེམས་ཀྱི་ཉམས་དང་གསུམ་མོ། །ལུས་ཉམས་འཆོང་རྒྱུག་དང་། འཕར་གཡོ་དང་། གར་འཁྲབ་ལ་སོགས་པའོ། །ངག་ཉམས། ངུ་རྒོད་དང་། གླུ་དབྱངས་དང་། སྃ་ཀྲྀ་ཏའི་སྐད་སྨྲ་བ་ལ་སོགས་པའོ། །སེམས་ཉམས་རིགས་དྲུག་གི་སྣང་བ་འཆར་བ་དང་། ནམ་མཁའ་ལ་འཕགས་ཏེ་འདུག་པ་སྙམ་པ་དང་། ས་གཏིང་དུ་བྱིང་སྟེ་འདུག་པ་སྙམ་པ་ལ་སོགས་པ་འོང་ངོ་། །ཐུན་མོང་མ་ཡིན་པ་གསུམ་ནི། བདེ་བ། གསལ་བ། མི་རྟོག་པ་གསུམ་མོ། །བདེ་བ་ནི། དེ་ལྟར་བསྒོམས་པས་ཞུ་བ་དེས་ཁྱབ་པའོ། །གསལ་བ་ནི་དེ་ཉམས་སུ་མྱོང་བའོ། །མི་རྟོག་པ་ནི་དེ་ལ་བདག་གིར་མི་བྱེད་པའོ། །དེ་ཚོ་ལམ་གྱི་རིམ་པའོ། །འབྲས་བུ་སྐྱེ་བའི་རིམ་པ་ནི། །ཐབས་དང་བཅས་ན་ཤིན་ཏུ་འབར། །བྱ་བ་ཡིན་པས། དེ་ལྟར་དངོས་པོའི་གནས་ལུགས་གཏན་ལ་ཕབ། ལམ་གྱི་རིམ་པས་ཉམས་སུ་བླངས་ནས་བསྒོམས་པས། 
1-1-198a
འབུས་བུ་དྲོད་དང་། བདེ་བ་དང་། མི་རྟོག་པ་གསུམ་འཆར་ཏེ། དེ་ལ་དྲོད་ནི་སྐྱེས་པ། ཀླུངས་སུ་ཕེབས་པ་དང་། བརྟན་པ་ཐོབ་པ་གསུམ་མོ། །དྲོད་སྐྱེས་པ་ནི། རྩོ་ཁ་བྱེ། ཨ་ཐུང་གི་ནུས་པ་རྒྱས། མེ་རླུང་གྱེན་ལ་འབར་བས། དམིགས་པ་གཏད་པའི་སར་ཚ་ཙག་པ་འཚིག་པ་འདྲ་བ་འབྱུང་ལ། མ་གཏད་ན་ཡང་ཚ་རོད་ཡོད་པ་ན་དྲོད་སྐྱེས་པ་སྟེ་རྩ་བ་ཟིན་པའོ། །ཀླུངས་སུ་ཕེབས་པ་ནི། དེ་ཙམ་ན་རྩ་རྣམས་འཁྲོས་ནས་ཕྱི་ནང་མེད་པར་འབྱུང་ངོ་། །བརྟན་པ་ཐོབ་པ་ནི་བསྒོམས་མ་བསྒོམས་འདྲ་བར་འབྱུང་བའོ། །བདེ་བ་ནི་གཡོ་བ། འབར་བ། བརྟན་པའི་(པ་)དང་གསུམ་མོ། །གཡོ་བ་ནི་རྩ་རྣམས་ནས་ཐིག་ལེ་གཡོས་པས་ཕོ་བདེ་ཟུག་དང་བཅས་པ། བསྲན་ཐབས་མེད་པ་འབྱུང་སྟེ། འཛག་པ་བསྲུང་དཀའ་བའོ། །འབར་བ་ནི། རྩ་ནང་དུ་བབ་པས། མོ་བདེ་སྟོབས་ཆེན་པོ་འབར་བའོ། །བརྟན་པ་ནི། དེ་ཙམ་ན་མེའི་ནུས་པས་ཡས་བབས་ཀྱི་བདེ་བ་ནི་སྤྱི་བོའི་འཁོར་ལོ་ལ་སོགས་པར་འཛིན་ནུས་པའོ། །མི་རྟོག་པ་ནི། ཞི་གནས། ལྷག་མཐོང་། ཟུང་དུ་འཇུག་པ་དང་གསུམ་མོ། །ཞི་གནས་ནི་བདེ་བ་ལ་སེམས་ཟིན་ནས་མི་རྟོག་པར་གནས་སོ། །དེ་ཡི་རྟགས་ལྔ་འཆར་ཏེ་སྒྱུ་མ་ལྟ་བུའི་ཏིང་ངེ་འཛིན་ཞེས་བྱའོ། །ལྷག་མཐོང་ནི། དེ་ཡི་རྐྱེན་གྱིས་རླུང་དབུ་མར་ཚུད་པའོ། །དེའི་རྟགས་འོད་གསལ་ནམ་མཁའ་ལྟ་བུར་འཆར་བའོ། །ཟུང་འཇུག་ནི་གཉིས་པོ་ཟུང་དུ་འཇུག་པ་སྟེ། དེའི་རྟགས། མཐའ་བཞི་རང་གྲོལ། རང་བྱུང་ལྷུན་གྲུབ། འགྱུར་མེད་བདེ་ཆེན་གྱི་རྟོགས་པ་གསུམ་འབྱུང་ངོ་། །དེ་ཚོ་སྦྱོར་བ་དྲུག་གི་གདམས་ངག་གོ། །དེ་ཡང་རིམ་ལྔ་ལས། ལྟེ་བ་ཆུ་སོ་འཚམས་འཁོར་ལོ། །གྲུ་གསུམ་དཀར་ཞིང་དམར་བ་ལ། །ཐིག་ལེ་ཁ་དོག་གསུམ་བསམ་སྟེ། །སངས་རྒྱས་ལྔ་རུ་མཚོན་པར་བྱ། །སྲོག་འགོག་པ་དང་ལྡན་
1-1-198b
བྱས་ན། སྐད་ཅིག་དེ་ལ་འབར་འགྱུར་ཏེ། འཇིག་རྟེན་ཁམས་རྣམས་མཆོད་པའི་གནས། །རྡོ་རྗེ་འཛིན་པ་ཉིད་དུ་འགྱུར། ཞེས་གསུངས་པའི་དོན་ནི་བཞི་ལམ་འབྲས་བུ་གསུམ་སྟེ། དེ་ལ་དང་པོ་རིམ་ལྔ་ལས་ཀྱང་བྱ་བ་ནི་བདག་བྱིན་གྱིས་བརླབ་པ། སྣ་ཚོགས་རྡོ་རྗེ། ནོར་བུ་འགེངས་པ། ཛཱ་ལན་དྷ་རཿ བསམ་གྱིས་མི་ཁྱབ་པའི་རིམ་པ་དང་ལྔའོ། །ལྟེ་བ་ཆུ་སོ་འཚམས་འཁོར་ལོ། །གྲུ་གསུམ་དཀར་ཞིང་དམར་བ་ལ། ཞེས་བྱ་བ་ནི། ལྟེ་བ་དང་ཆུ་སོའི་བར་ན་ཚངས་པའི་དབྱུག་པའི་མར་ན་གསང་གནས་ཀྱི་འཁོར་ལོ་ལ་གཏད་པ། རྩ་གསུམ་འབྲལ་འཚམས་ཀྱི་མདུད་པ་གྲུ་གསུམ་པ་ཅིག་(ཞིག་)གནས་པའོ། །དེ་ནི་དངོས་པོའི་གནས་ལུགས་སོ། །དེ་ཡང་ལམ་གྱི་རིམ་པ་དང་། སྦྱར་ན་གསུམ། ཕྱི་ལུས་ཀྱི་གྲུ་གསུམ། ནང་རྩའི་གྲུ་གསུམ། གསང་བ་བདེ་སྐྱོང་གི་གྲུ་གསུམ་མོ། །དེ་ལ་ཕྱི་ལུས་ཀྱི་གྲུ་གསུམ་ནི། ལུས་གནད་ཙོག་བུར་བསྡད། ལག་པ་གཉིས་ཀྱིས་པུས་མོ་གཉིས་མཁྱུད་པས་གྲུ་གསུམ་དུ་འོང་ངོ་། །ནང་རྩའི་གྲུ་གསུམ་ནི། དེ་ལྟར་བྱས་པས་རྩ་ཡང་གྲུ་གསུམ་དུ་འོང་ངོ་། །གསང་བ་བདེ་སྐྱོང་གི་གྲུ་གསུམ་ནི། ལྟེ་བ་འོག་སོར་བཞིར་བརྩལ་བ་ན། མ་ལས་ཐོབ་པའི་ཁྲག་གིས་ཐིག་ལེ་དེ་གྲུ་གསུམ་དུ་རང་བཞིན་གྱིས་གནས་པའོ། །དེ་ལྟར་ཕྱི་ནང་གསང་གསུམ་གྱི་མེ་ཐབ་གྲུ་གསུམ་བཅས་པས། ལམ་གྱི་ཡེ་ཤེས་ཀྱི་མེ་འབར་བའི་གནས་ཡིན་ནོ། །དེ་ཉིད་སྒོམ་པ་ནི་བདག་བྱིན་གྱིས་བརླབ་པའི་རིམ་པའོ། །ཐིག་ལེ་ཁ་དོག་ལྔ་བསམ་སྟེ། ཞེས་པ་ནི་གྲུ་གསུམ་དེའི་ཤར་ན་ནག་པོ། །བྱང་ན་ལྗང་ཁུ། ནུབ་ན་དམར་པོ། །ལྷོ་ན་སེར་པོ། །དབུས་ན་མེ་རྒྱ་ཁབ་ཙམ་པ། རེག་བྱ་ཚ་བ། སོར་བཞི་པ་ཅིག་(ཞིག་)གི་སྟེང་ན་དཀར་པོའི་ཐིག་ལེ་དང་ལྔ་བསམ་མོ། །སངས་རྒྱས་ལྔ་རུ་མཚོན་པར་བྱ། །ཞེས་བྱ་བ་ནི་ནང་གི་རིགས་ལྔའོ། །སྣ་ཚོགས་
1-1-199a
རྡོ་རྗེའི་རིམ་པའོ། །དེའི་སྟེང་དུ་རྩ་གསུམ་སེང་ངེ་ཡོད་པར་ཨ་ཝ་དྷུ་ཏིའི་ནང་དུ་མེད་དེ་བསམ་ལ། དེར་དམིགས་པ་ནི་སྲོག་འགོག་པ་དང་ལྡན་བྱས་ན། ཞེས་པ་ནི། གཡས་པ་དང་གཡོན་པའི་སྲོག་དང་རྩོལ་བའི་རླུང་། འགོག་པ་ཞེས་ཀྱང་བྱ། དེ་ཉིད་ལ་འགག་པ་ཞེས་ཀྱང་བྱ་སྟེ། དེ་ཡི་ཐབས་ལ་ལྔ། རྔུབ་པ་དགང་བ། ཞི་བ། བུམ་པ་ཅན། རྡུལ་དུ་བྱ་བའོ། །དེ་དག་གིས་ནི། དབང་དུ་བྱ་བ་དང་། རེངས་པར་བྱ་བ་དང་། ཞི་བ་དང་། འགག་པ་དང་། དྭངས་པར་བྱ་བ་ལ་བསླབ་པའོ། །དེ་ལྟར་རླུང་གིས་མེའི་ནུས་པ་སྐྱེས་ནས་གྱེན་དུ་སོང་བས། དབུས་ཀྱི་ཐིག་ལེ་ཞུ་བའི་བདེ་བས་གང་བར་བསམ་མོ། །འདི་ནི་ནོར་བུ་འགེངས་པ་དང་སྦྱར་རོ། །སྐད་ཅིག་དེ་ལ་འབར་འགྱུར་ཏེ། །བྱ་བ་ནི་རླུང་སེམས་དབུ་མའི་ནང་དུ་བཙུད་ནས་སྒོམས་པས། ཐིག་ལེར་རླུང་སེམས་ཚུད་པས། སྐད་ཅིག་ལ་མེའི་ནུས་པས་རྩ་གཡས་པས་ནང་ཕུག་སྟེ། ཛྭ་ལན་དྷ་རཿའི་སྒོ་ཕྱེ་ནས། དེ་བཞིན་གཤེགས་པ་ལྔའི་ངོ་བོར་གྱུར་པའི་ཁམས་ལྔའི་ཐིག་ལེ་ཞུ་བར་གྱུར་པ། གཡོན་པའི་རྩ་ནས་སྤྱན་དྲངས་ཏེ། བདེ་སྟོང་ཡེ་ཤེས་ཀྱི་མེ་འབར་བས། དེའི་ངང་དུ་རྟོགས་པ་མངོན་དུ་རྒྱུ་བའི་རིགས་ནི་བསྲེགས་ནས། སེམས་ཞི་བ་ཐོབ་པ་ནི། ཛྭ་ལན་དྷ་རའི་རིམ་པའོ། །འབྲས་བུ་ནི། འཇིག་རྟེན་ཁམས་རྣམས་མཆོད་པའི་གནས། །བྱ་བ་ནི་སངས་རྒྱས་ཉིད་ཡིན་ནོ། །དེ་ཇི་ལྟར་འགྲུབ་ན། རྡོ་རྗེ་འདི་པ་ཉིད་དུ་འགྱུར་ཞེས་པས་རྡོ་རྗེ་སྟོང་པ་འཛིན་པ་སྙིང་རྗེ་སྟེ། བདེ་སྟོང་གཉིས་སུ་མེད་པའི་དེ་ཁོ་ན་ཉིད་བསམ་གྱི་(གྱིས་)མི་ཁྱབ་པའི་རྟོགས་པ་མཐར་ཐུག་པ་ཐོབ་པར་འགྱུར་རོ། །ཞེས་པའོ། །རིམ་པ་ལྔ་པའོ།། །།འདིར་དཔལ་ཀུན་ཏུ་ཁ་སྦྱོར་ལས་གསུངས་པ། མཉམ་པ་མ་རུངས་དཔྲལ་བ་ཅན། །དྷུ་ཏིར་ཚུད་ན་བྱང་སེམས་རྒྱུན་མི་འབབ། །ཅེས་པ་ལ་ཡང་གཞི་ལམ་འབྲས་
1-1-199b
བུ་གསུམ་སྟེ། དང་པོ་མཉམ་པ་ཞེས་བྱ་བས་དངོས་པོའི་གནས་ལུགས་ནི། ཕ་མ་ཡབ་ཡུམ་མཉམ་པར་འདུས་པའི་རྡོ་རྗེ་པདྨ་དང་། ཁམས་དཀར་དམར་མཉམ་པར་སྦྱོར་བའི་དབུས་སུ་བར་དོའི་རླུང་སེམས་ཚུད་པ། བྱང་ཆུབ་རྣམ་པ་ལྔའི་ཚུལ་དུ་ལུས་རྩ་གསུམ་འཁོར་ལོ་བཞིར་ཆགས་ནས་ཕྱིར་མ་བྱུང་གི་བར་ལ། བག་ལ་ཉལ་གྱི་རླུང་ཕྲ་མོ་ཅིག་(ཞིག་)མིན་པ། རླུང་སེམས་དྷུ་ཏིའི་ནང་དུ་མཉམ་པར་གནས་པས། ངོ་བོ་ཉིད་ཀྱིས་ཡོན་ཏན་དང་བཅས་ནས་ཡོད་པ་ནི་མཉམ་པའོ། །མ་རུངས་པ་ནི་མངལ་ནས་འཐོན་པའི་ཚེ་རླུང་སེམས་བྲལ་ཏེ། དཀར་དམར་གྱི་ཁ་སྦྱོར་ཞིག །སྲོག་བརྩོལ་(རྩོལ་)ཡན་པར་ཤོར། །སེམས་གཟུང་འཛིན་དུ་བརྒྱུས་པས་ཟག་པ་དང་སྡུག་བསྔལ་བསྐྱེད་པའོ། །གཉིས་པ་དེ་ལམ་དུ་བྱ་བ་ནི། དཔྲལ་བ་ཅན་ཞེས་བྱ་སྟེ། ལུས་ཀྱི་གནད་རྐང་པ་རྡོ་རྗེའི་དཀྱིལ་དཀྲུང་ལ་སོགས་པ་སྟེ་དཔྲལ་བར་ལྟའོ། །ཡུལ་གྱི་གནད། རྩ་གསུམ་གྱི་མདོར་མེ་དང་། དཔྲལ་བའི་ཐིག་ལེ་ལ་གཏད་དོ། །དུས་ཀྱི་གནད་རླུང་གཉིས་མཉམ་དུ་རྒྱུ་བའི་དུས་སོ། །རླུང་གི་གནད་ནི། རྡོ་རྗེའི་བཟླས་པ་དང་། བུམ་པ་ཅན་དང་། བཙན་ཐབས་སུ་དབབ་པའོ། །དེ་རྣམས་བསྟུན་ནས་བསྒོམས་པ་ནི་ལམ་གྱི་རིམ་པའོ། །གསུམ་པ་འབྲས་བུ་ནི། དྷུ་ཏིར་ཚུད་ན་བྱང་སེམས་རྒྱུན་མི་དབབ། ཅེས་པས། རླུང་སེམས་དབུ་མར་ཚུད་པའི་དུས་སུ། རླུང་སྟེ་འོག་གི་གནས་ཁ་སྦྱོར་བུམ་པ་ཅན་དུ་གྱུར་བས། རིལ་པ་ཞབ་ཚགས་ཅན་གྱི་དཔེ་དང་། འདྲ་བར་ཁམས་དྭངས་མའི་ཆུ་རྒྱུན་འཛག་པ་མེད་པའི་ནུས་པ་ཐོབ་སྟེ། དེ་རླུང་སེམས་མལ་དུ་ཚུད་པས། བྱང་ཆུབ་ཀྱི་སེམས་གྱེན་ལ་ལོག་ནས། རྩ་རྡོ་རྗེའི་དཀྱིལ་དཀྲུང་གྱུར་པས་སྦ་བ་སྦུབས་སུ་ནུབ་ཟག་མེད་ལྷན་ཅིག་སྐྱེས་པའི་ཡེ་ཤེས་ལྟར་མི་སྣང་བས། དབུའི་གཙུག་ཏོར་ལྟར་མི་མངོན། རྟེན་འབྲེལ་བཅུ་
1-1-200a
གཉིས་ལུགས་ལས་བཟློག་པས་ས་བཅུ་གཉིས་ནོན། འཁོར་ལོ་བཞིར་ཡས་འབབས་ཀྱི་དགའ་བ་བཞི་མས་བརྟེན་པས་འབྲས་བུ་སྐུ་བཞི་འཐོབ། ཁམས་དམར་ཆ་དྲོད་མེའི་རང་བཞིན་གྱེན་དུ་འབར་བ་སྤྱི་བོ་ནས་ཐུར་དུ་སྦུབ་པས། རྐང་པའི་ཐེ་(མཐེ་)བོའི་བར་དུ་འགྲོས་རྫོགས་པས་འོག་ཏུ་ཉི་མའི་གདན་དང་། དཀར་ཆ་ཆུང་ངུའི་རང་བཞིན་འོག་ཏུ་འབབ་པ་གསང་རྩེ་ནས་བཀག་པས། མས་བརྟན་གྱིས་འགྲོས་སྤྱི་གཙུག་ཏུ་ཐིམ་པས་དབུ་ལ་ཟླ་ཚེས་རྡོ་རྗེས་བརྒྱན་པའི་ཤྲཱི་ཧེ་རུ་ཀར་འགྱུར་རོ། །ཁུངས་སྙན་རྒྱུད་གདམས་ངག་ཏུ་བཀྲོལ་ཏེ་བཤད་པ་ཡིན་ནོ། །རྡོ་རྗེའི་ཚིག་གི་མདུད་འགྲོལ་རྫོགས་སྷོ།། །།
༄། །འཕོ་བའི་མན་ངག །
རས་པ་ཡབ་སྲས་ཀྱིའོ། །རིམས་ཀྱིས་འཇུག་པའི་གང་ཟག་གི། །ཤེས་པ་སྐྱེ་ལུགས་འདི་ལྟ་སྟེ། སྣང་བ་ཐིམ་དང་གཏོགས་པ་ཐིམ། །རགས་པ་ཐིམ་དང་ཕྲ་བ་ཐིམ། །ཐིམ་པའི་རྗེས་ལ་གོམས་པ་དང་། །རང་ཞིན་གྱིས་ནི་འོད་གསལ་འབྱུང་། །དེའི་རྗེས་ལ་ཟུང་འཇུག་གི། །སྐུ་ནི་རྣམ་པ་གཉིས་འབྱུང་སྟེ། །སློབ་པ་དང་ནི་མི་སློབ་གཉིས། །མི་སློབ་པ་རུ་གྱུར་ཙམ་ན། །འབྲས་བུ་ཐོབ་ཅེས་བསྟན་པ་ཡིན། །གོང་དུ་བསྟན་པ་དེ་དག་གི། །དོན་ཞིབ་ཏུ་བྱས་ན་འདི་ལྟ་སྟེ། །དང་པོའི་ལུང་རིགས་མན་ངག་གིས། །རྒྱུད་ལ་རྟོགས་པ་ཤར་ཙམ་ན། །སྣང་བ་འགགས་པའི་འགག་ལུགས་ནི། །གཟུགས་སྒྲ་ལ་ཐིམ། དེ་བཞིན་དུ་དྲི་དང་། རོ་དང་། རེག་དང་། ས་དང་། ཆུ་དང་། མེ་དང་། རླུང་དེ་རྣམས་རིམས་ཀྱིས་སྣང་བ་ལ་ཐིམ། སྣང་བའི་དུས་ན་ཕྱི་རྟགས་ཟླ་བ་ཤར་བ་ལྟ་བུ། ནང་གི་རྟགས་དུ་བ་ལྟ་བུའོ། །སྣང་བ་མཆེད་པ་ལ་ཐིམ་ཙམ་ན། རྟགས་ཉི་མ་ཤར་བ་ལྟ་བུ། ཤེས་པ་མེ་ཁྱེར་བ་ལྟ་བུའོ། །མཆེད་པ་ཐོབ་པ་ལ་ཐིམ་ཙམ་ན། རྟགས་མུན་པ་ལྟ་བུ། ཤེས་པ་མར་མེ་ལྟ་བུའོ། །ཐོས་པ་འོད་གསལ་ལ་ཐིམ་ཙམ་ན། 
1-1-200b
རྟགས་ཐོ་རངས་སྐྱ་རེང་ཤར་བ་ལྟ་བུའོ། །ཤེས་པ་ནམ་མཁའ་སྤྲིན་དྭངས་པ་ལྟ་བུའོ། །འོད་གསལ་ལས་ལངས་པའི་ཟུང་འཇུག་གི་སྐུ་དེ་ངོ་ཤེས་པར་བྱ་སྟེ། ངོ་ཤེས་ཤིང་བར་དོ་འགུགས་ལུགས་ནི་གསུམ་སྟེ། རང་བཞིན་གྱི་འོད་གསལ་དང་། ཟུང་འཇུག་གི་སྐུ་དང་། མངལ་གྱི་སྐྱེ་གནས་དགག་པ་སྟེ་གཞན་ལན་གསལ་ལོ། །དེ་ངོས་ཟིན་ན་འོད་གསལ་གྱི་མེས་བག་ཆགས་ཐམས་ཅད་སྦྱོང་བའི་དུས་ན། སློབ་པའི་ཟུང་འཇུག་ཅེས་བྱའོ། །དེ་སྦྱང་གཞི་དང་སྦྱོང་བྱེད་མེད་པར་གོམས་པ་མཐར་ཕྱིན་ཙམ་ན། མི་སློབ་པའི་ཟུང་འཇུག་ཅེས་བྱ་སྟེ། འབྲས་བུ་ཐོབ་པའོ། །ཟུང་འཇུག་དེ་ངོས་མ་ཟིན་བར་དོའི་སྒྱུ་མ་ཡིན་ཏེ། དེའི་མཚན་ཉིད་ནི། དབང་པོ་ཀུན་ཚང་ཐོགས་མེད་ལྡན་ལ་སོགས་པ་གཞན་ནས་བཤད་པ་ལྟར་འཐུན་ཏེ། ཆུ་ལས་ཉ་ལྡང་བཞིན་དུ་བྱུང་ནས། སྐྱེ་བ་གཞན་ལེན་པ་ལ་སོགས་པ། སྡུག་བསྔལ་གྱི་རྒྱུར་འགྱུར་རོ། །དེ་ལ་བར་མ་དོ་ལམ་དུ་ཁྱེར་བ་དེ། འཆི་ཀའི་དུས་སུ་བསླབ་པ་ནི། འཆི་ཀའི་དུས་སུ། ས་ཆུ་ལ་ཐིམ་པ་ལ་སོགས་པ་ཤེས་པར་བྱ་ཞིང་། རང་གི་སེམས་ལ་ལྟ་ཞིང་། བར་དོ་ལ་བར་དོར་ངོ་ཤེས་པར་བྱའོ། །སྙམ་པའི་འདུ་ཤེས་དྲག་ཏུ་བྱ་ཞིང་། དེ་ཁོ་ན་བསྒོམས་ཏེ། འཆི་བའི་རྐྱེན་ཕ་དང་མ་ལ་ཆགས་པ་དང་སྡང་བ་སྐྱེས་པ་ཡིན་ཏེ། དེ་བཟློག་ཅིང་འོད་གསལ་དུ་གནས་པར་བྱའོ། །དེ་ཡི་དུས་སུ་ཡང་དེ་ཁོ་ན་བསྒོམ་པར་མ་ནུས་ཤིང་། སྐྱེ་བ་ལེན་ན་ཡང་། རང་གི་ཤེས་པ་བདེ་བ་ཅན་དུ་འགྲོ་བར་བྱ་སྟེ། རང་དབང་ཡོད་པར་ལུས་ལེན་པའོ། །དེ་ནི་བར་དོ་ལམ་དུ་ཁྱེར་བ་སྟེ། ཤེས་བཞིན་དུ་འཇུག་པའི་མན་ངག་གོ། །དེ་ལ་གོང་དུ་འཕོ་བ་བྱེད་ན་ཡང་། དང་པོར་ཆོས་ཐམས་ཅད་སྒྱུ་མ་དང་འདྲ་བ་ལ་ཡིད་ཆེས་པར་བྱའོ། །དེ་ལ་གོང་དུ་འཕོ་བའི་མན་ངག་ལ་གཉིས་ཏེ། ཏིང་ངེ་འཛིན་གྱིས་དང་རྩོལ་བས་སོ། །ཏིང་ངེ་འཛིན་གྱིས་འཕོ་བ་བྱེད་ན། དང་
1-1-201a
པོ་རླུང་སྦྱངས་ཏེ། དེ་ཡང་རང་གི་སྟེང་རླུང་དེ་སྙིང་ཁར་(གར་)ཡི་གེ་ཧྃ་ཟེར་བ་ཐིག་ལེ་ཉུངས་འབྲུ་ཙམ་ལ་སེམས་གཏད་དེ། ཡུན་ཐུབ་ཚད་དུ་གཟུང་། །དབུགས་ངལ་ན་ཡང་སྣ་རྩེ་ནས་ཕར་ལ་དབུགས་དྲང་ངོ་། །དེ་ནས་སྙིང་ཀར་གཟུང་ཞིང་ཡང་དང་ཡང་དུ་ནན་ཏན་དུ་གོམས་པར་བྱས། ཇི་ཙམ་འདོད་པར་ཟིན་ཅིང་རང་ལ་དབང་ཡོད་པ་སྙམ་བྱེད་པ་འོང་ངོ་། །པུས་མོ་བསྐོར་ཞིང་སེ་གོལ་གཏོག །བརྒྱ་དང་རྩ་བརྒྱད་ཟིན་པའི་ཚད། །ཅེས་(ཞེས་)གསུངས་སོ། །སྙིང་ཀར་ཟིན་ན་སྐོག་མར་བཟུང་བར་བྱའོ། །དེར་དབུགས་ངལ་ན་སྣ་སྒོར་ངལ་བསོ། །དེ་ནས་རང་འདོད་གནས་སུ་ཟིན་གྱུར་ན། །བདེ་བའི་འཁོར་ལོར་དྲང་བྱས་ཏེ། །ཤེས་པ་བདེ་བ་ཅན་དུ་གཏད། །ཚངས་པའི་སྒོ་ནས་འཕོ་བར་བྱའོ། །འཕོ་བའི་མན་ངག་གོ། །ཨྠཱྀི། བརྩོལ་(རྩོལ་)བས་འཕོ་ན་འདི་ལྟ་སྟེ། དང་པོ་འཆི་བའི་རྟགས་ངེས་པར་བྱུང་སྟེ། རང་གིས་མི་ཐར་བར་ཤེས་ན། དང་པོར་ཆོས་ཐམས་ཅད་སྒྱུ་མ་ལྟ་བུར་ཡིད་ཆེས་པར་བྱས་ཏེ། དེ་ནས་རང་གི་ལྷའི་རྣལ་འབྱོར་ཏེ། ལུས་ཀྱི་འཁྲུལ་འཁོར་གཅོད་པའོ། །དེའི་རྗེས་ལ་ཡིད་ལ་དེ་ཁོ་ནར་མོས་པར་བྱ་སྟེ། ཡིད་ཀྱི་འཁྲུལ་འཁོར་གཅོད་པའོ། །དེ་ནས་ཨ་ལི་ཀ་ལི་བཟླས་ཏེ། ངག་གི་འཁྲུལ་འཁོར་གཅོད་པའོ། །དེ་ནས་ཤེས་པ་བདེ་བ་ཅན་དུ་གཏད་དེ། བསམ་པ་དེར་གཏད་ལ་རང་གི་ཤེས་པ་སྙིང་ཁར་(གར་)ཧཱུྃ་ལ་བསྡུ་སྟེ། ལག་པ་གཉིས་ལྟག་པར་སྦྲེལ་ཏེ། སྙིང་གྱེན་ལ་བཟློག་པར་བསམས་ལ། ལུས་དབྱུག་པ་ལ་བཀན་ཏེ། ངག་ཨ་ཧིག་བྱས་པས་ཁ་ནས་འཕོ་བར་བྱའོ། །འཆི་རྟགས་ངེས་ན་འཕོ་བྱ་སྟེ། འཆི་རྟགས་མེད་ན་སངས་རྒྱས་གསོད། །འཕོ་བའི་མན་ངག་གོ། །ཨྠཱིྀ། །ཀླུ་གྲུབ་(སྒྲུབ་)ནས་རྒྱུད་(བརྒྱུད་)པའོ།། །།
༄། །རྣམ་ཤེས་བར་དོ་སྦྱངས་ཚུལ།
བླ་མ་དམ་པ་རྣམས་ལ་ཕྱག་འཚལ་ལོ། །གང་ཟག་བློའི་ཁྱད་པར་གྱིས། །རིམས་ཀྱིས་པ་དང་གཅིག་ཆར་བ། །རིམས་
1-1-201b
ཀྱིས་པའི་སྨན་ཆེན་འདི། ཅིག་ཆར་བའི་དུག་ཆེན་ཡིན། །གཅིག་ཆར་བའི་སྨན་ཆེན་འདི། །རིམས་ཀྱིས་པ་ཡི་དུག་ཏུ་འགྱུར། །དེས་ན་སྦྱངས་པའི་འཕྲོ་ཅན་ལ། །གཅིག་ཆར་བ་ནི་བསྟན་པར་བྱ། །སེམས་ཅན་དང་པོའི་ལས་ཅན་ལ། །རིམས་ཀྱིས་པར་ནི་བསྟན་པར་བྱ། །དང་པོ་ཉོན་མོངས་གདུལ་བ་ནི། །ཁམས་ཀྱིས་རབ་ཏུ་དབྱེ་བར་བྱ། །ཕུང་པོའི་གཞིག་དགྲོལ་བསྒོམ་པར་བྱ། །བསྐྱེད་རིམས་གཞུང་ལས་ཤེས་པར་བྱ། །ངག་དབེན་རླུང་ཉིད་སྒོམ་པ་ནི། །བླ་མའི་ཞལ་ནས་ཤེས་པར་བྱ། །སེམས་ལ་དམིགས་པའི་མན་ངག་ནི། །བདེ་བ་ཆེན་པོའི་མན་ངག་གོ། །ཕྱག་རྒྱ་ཆེན་པོའི་མན་ངག་ནི། །གདམས་ངག་ཚིག་བསྡུས་དག་ལས་ཤེས། །ཟུང་དུ་འཇུག་པའི་རིམ་པ་ལ། །སློབ་པ་དང་ནི་མི་སློབ་གཉིས། །སློབ་པ་ཡང་རྣམ་གཉིས་ཏེ། །སྒྱུ་མ་དངོས་དང་འོད་གསལ་ལོ། །སྒྱུ་མ་ལྟ་བུའི་ལུས་སྒོམ་པ། །མངོན་པར་རྟོགས་པའི་རིམ་པ་དང་། །རང་གི་ལྷམ་པར་གནས་པའོ། །མངོན་པར་རྟོགས་པའི་རིམ་པ་ལ། །གསང་བའི་དབང་གི་དུས་དག་ཏུ། །མེ་ལོང་དྲི་མ་མེད་པ་ལ། །རྡོ་རྗེ་སེམས་དཔའ་ལེགས་བྲིས་པའི། །གཟུགས་བརྙན་གསལ་བར་སྣང་དང་མཚུངས། །ཞེས་བྱ་བ་ནི་སྒྱུ་མའི་དཔེ་བཅུ་གཉིས་ཀྱི་སྒོ་ནས་རྟོགས་པར་བྱའོ། །རང་ནི་ལྷག་པར་གནས་པ་ལ། །གྲོང་དུ་འཇུག་དང་འཕོ་བ་དང་། །རྨི་ལམ་བར་དོ་རྣམ་པ་བཞི། །དེ་ལ་གྲོང་དུ་འཇུག་པ་ནི། །མདུན་དུ་དམིགས་པ་གསལ་བྱས་ལ། །དབུགས་དང་སེམས་ནི་མི་ཡེངས་པར། །ཡང་དང་ཡང་དུ་མ་ཡེངས་པར། །གཏད་ནས་ཡོངས་སུ་གོམས་གྱུར་ན། །འདིའི་ཤེས་པ་བྱིང་བ་དང་། །དམིགས་པ་ཇེ་གསལ་ཇེ་གསལ་འགྱུར། །དེ་ལས་ཡུན་དུ་གོམས་བྱས་ན། །རང་གི་ཕུང་པོ་དོར་བྱས་ནས། །བསོད་ནམས་ཅན་གྱི་ལུས་བླངས་ཏེ། །
1-1-202a
སེམས་ཅན་དོན་ནི་མ་ལུས་བྱ། །གོང་དུ་འཕོ་བ་རྣམ་གསུམ་སྟེ། །བསྐྱེད་པའི་རིམ་པའི་ཚུལ་དང་ནི། །སྒྱུ་མའི་དངོས་དང་འོད་གསལ་ལོ། །བསྐྱེད་པའི་རིམ་པའི་ཚུལ་ལ་ནི། །ཀྵྃ་ལ་སོགས་པའི་ཡི་གེ་ཡིས། །བུ་ག་དག་ཀྱང་དགག་བྱ་སྟེ། །རང་གི་སེམས་ནི་ལྷའི་སྐུ། འཇའ་ཚོན་ལྟ་བུར་སྒོམ་པ་འམ། །ཡང་ན་ཧཱུྃ་ལ་བསྡུ་བྱ་སྟེ། །ཚངས་པའི་བུ་ག་ནས་བཏོན་ཏེ། །འོག་མིན་གནས་སུ་ཡང་དང་ཡང་། །རྒྱུན་མི་འཆད་པར་གནས་པར་བྱ། །དེ་ལྟར་གོམས་པར་བརྟན་གྱུར་ན། །དུས་དང་རྟགས་རྣམས་ཤེས་བྱས་སྟེ། །འཕོ་ཁར་ཤེས་པ་གནས་སུ་བསྐྱལ། །དེ་ལྟར་བྱས་པས་ཐོབ་པར་འགྱུར། །སྒྱུ་མ་དངོས་ཀྱི་འཕོ་བ་ནི། །འོག་ནས་འབྱུང་བའི་རྨི་ལམ་ལ། །གོམས་པར་བྱ་སྟེ་སུམ་བཅུ་(ཅུ་)ནི། །རྩ་གསུམ་གནས་སུ་འཕོ་བྱ་སྟེ། །དེ་རུ་སྔར་གྱི་གང་གོམས་པའི། །སྒོམ་པ་ཁྲིད་དེ་བསྒོམ་གྱུར་ན། བདེ་བ་སྐྱེ་བའི་གནད་ཡིན་པས། །མི་རྟོག་ཡེ་ཤེས་ཐོབ་ནས་ནི། །ཚེ་འདི་ཉིད་ལ་སངས་རྒྱས་ནི། །ཐོབ་འགྱུར་འདི་ལ་ཐེ་ཙོམ་མེད། །སྔགས་པའི་འགྲོ་ས་མཆོག་ཡིན་ནོ། །མཚན་ཉིད་པ་ནི་ལྟུང་བར་འགྱུར། །འོད་གསལ་བ་ཡིས་འཕོ་བ་ནི། །འཆི་བའི་དུས་ནི་ཤེས་བྱ་སྟེ། །མི་རྟོག་པ་ལ་སེམས་ནི་གནས། །ལུས་ཀྱི་རྩོལ་བ་དག་གིས་ནི། །འོད་གསལ་བར་ནི་འཇུག་བྱ་སྟེ། །བར་དོ་མྱ་ངན་འདས་པ་ཡིན། །བསླབས་ནས་འཕོ་བ་དེ་ཚོ་ཡིན། །མ་བསླབས་པར་ཡང་འཕོ་བ་ཡོད། །རྨི་ལམ་ལ་ཡང་རྣམ་ལྔ་སྟེ། །དྲན་དང་སྒྱུ་མར་ཤེས་པ་དང་། །སྦྱང་དང་གོམས་པ་དཀྲི་བ་དང་། །གོང་དུ་འཕོ་བ་ཤེས་པར་བྱ། །དྲན་པ་ཞེས་བྱ་བའི་སྒོམ་པ་ནི། །གཉིད་མ་ལོག་པའི་དུས་སུ་ཡང་། །འདུན་པ་དག་ནི་སྔོན་བཏང་སྟེ། །ལོ་ཀ་མའི་ཤེས་པ་ནི། །དྲན་པས་ཡང་ཡང་དགུག་བྱས་ལ། །དགུགས་པས་
1-1-202b
ལོ་རེ་ལན་རེ་བཞིན། །རབ་རིབ་ཡད་ཡིད་འབྱུང་བར་འགྱུར། །དེ་ལྟར་དྲན་པ་བརྟན་གྱུར་ནས། །སྒྱུ་མ་དག་ཏུ་ཤེས་བྱས་ཏེ། །མ་ལོག་པའི་དུས་སུ་ཡང་། །སྣང་སྲིད་སྒྱུ་མར་ཤེས་བྱ་སྟེ། །སྒྱུ་མ་དངོས་ནི་རྨི་ལམ་ཡིན། །དེ་ཉིད་སྒྱུ་མར་མ་ཤེས་པས། །བར་དོ་སྒྱུ་མར་མ་ཤེས་ནས། །བར་དོའི་སྲིད་པ་མ་ཁེགས་པས། །སྐྱེ་བ་ཡང་དང་ཡང་བླངས་ཏེ། །ཁམས་གསུམ་འཁོར་བར་འཁྱམས་པ་ཡིན། །དེ་ལྟར་རྨི་ལམ་དངོས་དག་ལ། །བློ་ནི་འཇུག་ཏུ་མི་གཏུབ་ན། །སྔོན་དུ་འགྲོ་བར་དག་བྱ་སྟེ། །བསྐྱེད་རིམས་བཟླས་པའི་རྟགས་དག་དང་། །འདུ་འཛི་ཤིན་ཏུ་ཉུང་བ་དང་། །སྔར་གྱི་བསྒོམ་པ་བཀྲི་བ་དང་། །མོས་པ་ཤིན་ཏུ་དྲག་པ་དང་། །དགུག་པའི་དུས་དག་ཤེས་པའོ། །གཉིད་མ་ལོག་པའི་དུས་སུ་ཡང་། །དྲན་པ་དེ་ནི་སྒྱུ་མ་རུ། །ཤེས་བྱས་བསམ་པ་སྔོན་བཏང་ལ། །ནན་ཏན་དུ་ནི་བསྒོམ་པར་བྱ། །དེ་ལྟར་དུ་ནི་བསྒོམས་པ་དང་། །ཕན་ཚུན་དག་ཏུ་ཕྱིན་པ་དང་། ངལ་དུབ་དག་ནི་འོང་བ་དང་། །འགྲངས་ལྟོགས་དག་ནི་འོང་བ་དང་། །ཆོ་འཕྲུལ་དག་ནི་སྟོན་པ་དང་། །དེ་ལ་སོགས་པའི་མཚན་མ་རྣམས། །གཉིད་མ་ལོག་པའི་དུས་སུ་ཡང་། །གོམས་པར་བྱས་པའི་བག་ཆགས་ཀྱིས། །ལོ་ཁ་མའི་དུས་སུ་ཡང་། །མཚན་མ་དྲན་པ་དེ་སྙེད་ལ། །བག་མི་ཚ་བར་སྤྱད་པར་བྱ། །དེ་ལྟར་སྒྱུ་མར་ཡང་དང་ཡང་། །ཉིན་མཚན་དག་དུ་(ཏུ་)བསམས་ནས་སུ། །སྒྱུ་མར་ཤེས་པའི་མཚན་མ་ནི། །ཡ་མི་ང་དང་བག་མི་ཚ། །དམ་དུམ་སྐམ་སྐེམ་འབྱུང་བར་འགྱུར། །དེ་ལྟར་བརྟན་པར་བསྒོམ་པར་བྱ། །དེ་ལྟར་བརྟན་པར་གྱུར་ནས་ནི། །འཕོ་བ་དག་ནི་བྱ་བར་བཤད། །གཉིད་མ་ལོག་པའི་དུས་སུ་ཡང་། །རང་གི་གར་དགར་གཏང་བར་བྱ། །འགྲོ་སར་སེམས་ནི་གཏང་བྱས་ནས། །ལོ་ཁ་མའི་དུས་སུ་ཡང་། །དེང་གི་བག་ཆགས་དྲན་བྱས་ཏེ། །དེ་ལྟར་རང་གི་རིམ་པ་ཡིས། །དཔྱད་ཅིང་གང་
1-1-203a
ལྟར་བདེ་བར་འཕོ། །འཕོ་བ་བརྟན་པར་གྱུར་ནས་ནི། །སྒྱུ་མ་སྦྱང་བའི་མཚན་ཉིད་ཀྱིས། །སྔར་གྱི་བསམ་པ་བསྒྲིབ་པར་བྱ། །དེ་ལྟར་སྔ་མ་བཞིན་དུ་བསྒོམ། །ལེགས་པར་ཡང་དང་ཡང་དུ་བསྒོམ། །དེ་ལྟར་རྨི་ལམ་དུས་སུ་ནི། །དམ་དུམ་ཡད་ཡུད་འབྱུང་བར་འགྱུར། གང་ལའང་བཟང་ངན་མི་ལྟ་སྟེ། །རྟགས་མ་བྱུང་བའི་བར་ཡང་ཡིན། །རང་གི་རིག་པས་རྟོགས་བྱས་པ། །མ་རྟོགས་ན་ཡང་འབད་ཅིང་བརྟག །རྟོལ་བ་དག་གིས་སྐྱེད་བྱས་ལ། །ཤེས་པ་ཚར་ནི་གཅད་པར་བྱ། །དེ་ལྟར་ཡང་དང་ཡང་བྱས་པས། །མོད་དུ་ཟིན་པ་དག་ཀྱང་ཡོད། །ཟླ་བས་ཟིན་པ་དག་ཀྱང་ཡོད། །ལོ་ཡིས་ཟིན་པ་དག་ཀྱང་ཡོད། །གཏན་མི་ཟིན་པ་དག་ཀྱང་ཡོད། །ལས་འཕྲོ་མེད་པར་གྱུར་པས་ན། །གཞན་མ་དག་ལ་བསླབ་པར་བྱ། །ཆོས་སྤྱོད་ལ་སོགས་རྒྱུད་སྦྱངས་ལ། །དེ་ལྟར་ཡང་དང་ཡང་བསྒོམས་པས། རྨི་ལམ་བྱིན་གྱིས་རློབས་པ་ཡིན། །དེ་ཡིས་བར་དོ་རློབས་པར་འགྱུར། །གོང་མའི་རྨི་ལམ་གོམས་པ་ཡིས། །འཆི་བའི་ཤེས་པ་གསལ་བྱ་སྟེ། །འཆི་ཀའི་རྟགས་རྣམས་ཚང་བ་དང་། །སྔར་གོམས་པ་ལ་སེམས་བཞག་སྟེ། །འོད་གསལ་བར་ནི་འཇུག་པའམ། །གསལ་བ་མ་ཡིན་པར་འཇུག་པའོ། །འཆི་ཀར་གཉིད་ནི་ལོག་པར་ནི། །དྲན་པ་དག་ནི་སྔོན་བཏང་ནས། །ས་བོན་སྐྱེ་གནས་རིམ་ཁྱབ་པ། །བཞི་དང་ཁང་པ་ཉིད་དང་ནི། །ལས་དང་སྦྱོར་བ་རང་ནུས་ལ། །རང་གི་ངོ་བོར་ཐིག་ལེར་བཅས། །བཅུ་གཉིས་མཐའ་ཡི་ཚིག་གི་དོན། །གང་གིས་རྟག་ཏུ་བསྒོམས་གྱུར་ན། །དེས་ནི་དངོས་གྲུབ་བདེ་བ་ཡིས། །རྡོ་རྗེ་འཛིན་པར་རང་ཉིད་འགྱུར། །སྔོན་འབྱུང་སྲིད་པའི་ཤ་གཟུགས་ཅན། །ལས་ཀྱི་རྫུ་འཕྲུལ་ཤུགས་དང་ལྡན། །བར་དོ་དེའི་མིག་སྔ་རུ། །ཐབས་དང་ཤེས་རབ་མཐོང་བ་ལ། །བླ་མ་དག་ཏུ་དམིགས་བྱ་སྟེ། །
1-1-203b
གསང་བའི་དབང་ནི་དྲན་བྱས་ལ། །མིག་སེར་ཞེ་སྡང་ཀུན་སྤངས་ཏེ། །བདེ་བའམ་མི་རྟོག་བསྒོམས་པ་འམ། །ཡང་ན་སྔར་དུ་གང་གོམས་པའི། །སྒོམས་པའི་ཁྲིད་དེ་བསྒོམ་པར་བྱ། །སྦྱངས་པའི་དུས་སུ་དྲན་པར་བྱ། །དུས་སུ་དྲན་པར་གྱུར་ནས་ནི། །དང་པོ་སྲིད་པ་ཁེགས་པར་འགྱུར། །དེ་ནས་བདུན་ཕྲག་བདུན་གྱི་བར། །གོང་མ་བཞིན་དུ་བསྒོམས་བྱས་ནས། །བཞི་བཅུ་རྩ་དགུ་འདས་པ་དང་། །འཁོར་བའི་སྲིད་པ་ཁེགས་པ་ཡིན། །དེ་ལྟར་སྒྱུ་མར་གནས་པ་ལ། །འོད་གསལ་བ་ཡིས་སྦྱང་བྱ་སྟེ། །འོད་གསལ་བ་ལ་འཇུག་པར་འགྱུར། །གཙིགས་ཀྱི་རྒྱ་མདུད་དང་བཅས་པར་དམ་པར་གྱིས་ཤིག། །།
༄། །རྣལ་འབྱོར་རྣམ་གསུམ།
༄། །ན་མོ་རད་ན་(རཏྣ་)གུ་རུ། དམན་པ་དབྱིབས་ལ་ཟབ་པ་སྔགས། །མཐར་ཐུག་ཆོས་ཀྱི་རྣལ་འབྱོར་ནི། །དབྱིབས་ཀྱི་རྣལ་འབྱོར་ལ་གསུམ་སྟེ། སྤྲོས་བཅས་དང་། སྤྲོས་མེད་དང་། ཤིན་ཏུ་སྤྲོས་མེད་དོ། །སྔགས་ཀྱི་རྣལ་འབྱོར་ལ་གསུམ་ཏེ། ལུས་ལ་སྔགས་ཀྱི་རྣལ་འབྱོར་དང་། རླུང་ལ་སྔགས་ཀྱི་རྣལ་འབྱོར་དང་། ཐིག་ལེ་སྔགས་ཀྱི་རྣལ་འབྱོར་རོ། །དང་པོ་ལ་གསུམ་སྟེ། འཁོར་ལོ་ཅིག་ལ་བརྟེན་པ་དང་། གཉིས་ལ་རྟེན་(བརྟེན་)དང་། བཞི་ལ་བརྟེན་པའོ། །རླུང་ལ་གསུམ་སྟེ། བགྲང་ཞིང་བརྩི་བ་ལ་བསླབ་པ་དང་། ཡན་ལག་ལ་བསླབ་པ་དང་། བུམ་པ་ཅན་ལ་བསླབ་པའོ། །དེ་ལ་གཉིས་ཏེ། སེང་གེ་རྣམ་གྲོལ་གྱི་ཕྱག་རྒྱས་དགག་པ་དང་། དགག་པའི་སྦྱོར་བའོ། །ཐིག་ལེ་ལ་གཉིས་ཏེ། སྟེང་སྒོ་རྣམ་པར་གྲོལ་བ་དང་། འོག་སྒོ་བདེ་བ་ཆེན་པོ་ལ་བརྟེན་པའོ། །དང་པོ་ལ་གསུམ་སྟེ། སྟེང་གི་སྣ་རྩེ་སྙིང་ཁར་(གར་)ཉི་ཟླ་ཁ་སྦྱོར། འོག་གི་སྣ་རྩེ་གསང་བར་ཐིག་ལེ་ཉག་ཅིག་ལུས་ཀྱི་དབུས་སུ་དཀྱིལ་འཁོར་བཞི་བསྲེགས་ནས་བདེ་བའི་ཐིག་ལེ་བསྒོམ་པའོ། །ཆོས་ཀྱི་རྣལ་འབྱོར་ལ་གསུམ་སྟེ། ཐིག་ལེ་ཆོས་ཀྱི་རྣལ་འབྱོར། སྣང་
1-1-204a
བ་ཆོས་ཀྱི་རྣལ་འབྱོར། སྤྲོས་མེད་ཀྱི་རྣལ་འབྱོར་རོ། །དབྱིབས་ཀྱི་རྣལ་འབྱོར་གྱིས་ཐ་མལ་གྱི་རྟོག་པ་སྤོང་། སྤྲུལ་པའི་སྐུ་འཐོབ། ཞི་གནས་ལས་སུ་རུང་། བསོད་ནམས་ཀྱི་ཚོགས་རྫོགས་པར་བྱེད་དོ། །སྔགས་ཀྱི་རྣལ་འབྱོར་གྱིས། སྡུག་བསྔལ་དང་བཏང་སྙོམས་ཀྱི་རྟོགས་པ་སྤོང་། ལོངས་སྐུ་འཐོབ། ཞི་གནས་ལས་སུ་རུང་བར་བྱེད། ཡེ་ཤེས་ཀྱི་རྫོགས་པར་བྱེད་དོ། །ཆོས་ཀྱི་རྣལ་འབྱོར་གྱིས་དངོས་པོར་ཞེན་པ་སྤོང་། ཆོས་སྐུ་འཐོབ། ལྷག་མཐོང་ལས་སུ་རུང་། བདེ་བ་ཆེན་པོ་མངོན་དུ་བྱེད་དོ། །འབྲས་བུ་ལ་གཉིས། གཙོ་བོ་དང་། ཞར་ལ་སྒྲུབ་པའི་འབྲས་བུའོ། །དང་པོ་ནི་སྐུ་གསུམ་ཡེ་ཤེས་ལྔའོ། །གཉིས་པ་ནི་གྲུབ་ཆེན་བརྒྱད་དང་། ལས་རབ་འབྱམས་ཀྱི་ཚོགས་སོ། །དེ་སྐད་དུ་ཡང་། སྔགས་དང་དབྱིབས་དང་ཆོས་བདག་ཉིད། །རྣལ་འབྱོར་རྣམ་གསུམ་ཤེས་བྱས་ནས། །ཡེ་ཤེས་རྣམ་པ་གསུམ་གྱིས་ནི། །སྲིད་པའི་ཉེས་པས་གོས་མི་འགྱུར་ཞེས་སོ། །ཨྠཱིྀ།། །།
༄། །མན་ངག་ཚིགས་སུ་བཅད་པ་བརྒྱད་པ།
ན་མོ་གུ་རུ། མཁས་པ་ཆེན་པོ་ན་རོ་པས། བཅུ་གཉིས་བར་དུ་བླ་མ་བསྟེན། །ཞབས་དྲུང་གདམས་པ་མནོས་པ་ནི། །སྐྱེ་ཤི་རྨི་ལམ་བར་དོ་དང་། སྲིད་པ་བར་དོ་གསུམ་དུ་གནས། །ཉམས་བླང་བསྲེ་འཕོ་གཉིས་སུ་འདུས། །བསྲེ་བ་བསྒོམས་པའི་སངས་རྒྱས་དང་། །འཕོ་བ་མ་བསྒོམས་སངས་རྒྱའོ། །སྐྱེ་ཤི་བར་དོ་བསྐྱེད་རིམས་དང་། །རྩ་རླུང་རྫོགས་རིམས་བསྲེས་ལ་བསྒོམ། །རྨི་ལམ་བར་དོ་གཉིད་དུས་སུ། །འོད་གསལ་མན་ངག་སྒོམ་དང་བསྲེ། །རྨི་ལམ་དུས་སུ་སྒྱུ་ལུས་བསྲེ། །ཉམས་མྱོང་གཅིག་ལ་བརྟན་ནས་ནི། །འཆི་དུས་སྲིད་པ་བར་དོ་ཡི། །དང་པོ་མ་རིག་འོད་གསལ་འབྱུང་། །དེ་ཡི་དུས་སུ་རྩ་རླུང་དང་། །གཉིད་དུས་ཉམས་མྱོང་བརྟན་པ་ཡིས། །འོད་གསལ་བསྟིམ་པས་ཆོས་
1-1-204b
སྐུ་འཐོབ། །ཞེན་པས་བར་དོ་གཉིས་པ་འབྱུང་། །མ་དག་སྒྱུ་ལུས་གསལ་བ་ལས། །དག་པ་སྒྱུ་ལུས་ཐོབ་པའོ། །གཞན་པས་ཐོབ་པར་མ་གྱུར་ན། །བར་དོ་གསུམ་པ་འགྲོ་དྲུག་གི། །སྒོ་འདི་ཆགས་སྡང་གཉིས་ཀྱིས་བསྐྱེད། །བསྐྱེད་རྫོགས་གཉིས་ཀྱིས་ཆགས་སྡང་གི། །སྒོ་འདི་བཅད་པས་སངས་རྒྱས་ལ། །མི་ཐོབ་པ་ཡི་ཐེ་ཙོམ་མེད། །སངས་རྒྱས་དང་འདྲའི་བླ་མ་གསུང་། །སྦྱངས་ནས་འཕོ་དང་བཙན་ཐབས་འཕོ། །ལུས་བཅོས་པ་ཡིས་འཕོ་བའོ། །མ་བསྒོམས་སངས་རྒྱས་བླ་མ་གསུང་། །མན་ངག་ཚིགས་སུ་བཅད་པ་བརྒྱད་པ། རྗེ་བཙུན་མར་པ་ལོ་ཚ་བས་མཛད་པ་རྫོགས་སྷོ། །ཨྠཱྀི།། །།
༄། །བར་དོའི་རྣམ་གཞག་དང་ཉམས་ལེན།
གུ་རུ་ན་མོ། བླ་མའི་ཞལ་གྱི་གདམས་པ་འདི་ལ། སྔོན་དུ་ཡིད་ཆེས་པའི་ཡན་ལག་ཏུ། །བླ་མ་བརྒྱུད་པའི་རིམས་པ་ཞེས་བྱ་བ་ཅིག་(ཞིག་)བརྩི་བ་ལས། རྡོ་རྗེ་འཆང་གི་བྱིན་གྱིས་བརླབས་པའི་ཇོ་བོ་ཆེན་པོ་ཏེ་ལོ་པ་ལ། གདམ་ངག་གི་བཀའ་ཆེན་པོ་བཞི་བབས་པ་ལས། སློབ་དཔོན་ཀླུ་གྲུབ་(སྒྲུབ་)ཡབ་སྲས་ནས་གདམས་ངག་གི་བཀའ་ཅིག་(ཞིག་)བབས། སློབ་དཔོན་ནག་པོ་ལ་བའི་ན་བཟའ་ཅན་ནས་གདམས་ངག་གིས་(གི་)བཀའ་ཅིག་(ཞིག་)བབས། མཁའ་འགྲོ་མ་སུ་མ་ཏི་བསྐལ་པ་བཟང་མོ་ནས་གདམས་ངག་གི་བཀའ་ཅིག་(ཞིག་)བབས། བྲམ་ཟེ་ཆེན་པོ་ས་ར་ཧ་ནས་གདམས་ངག་གི་བཀའ་ཅིག་(ཞིག་)བབས་སོ། །དེ་ལྟ་བུའི་གདམས་ངག་ཅན་གྱི་ཇོ་བོ་ཏེ་ལོ་པ་ལ། བླ་མ་ནཱ་རོ་པས། ལུང་བསྟན་གྱི་རྗེས་སུ་འབྲངས་ནས། ལོ་བཅུ་གཉིས་བསྟེན། དཀའ་བ་མི་འདྲ་བ་བཅུ་གཉིས་སྤྱད་པའི་ཐ་མ་ལ། བླ་མའི་ཞལ་གྱི་གདམས་ངག་འདི་གནང་། དེ་ལ་བླ་མ་མར་པ་ལོ་ཙྰ་བས་ལོ་མང་དུ་བསྟེན་གསེར་གྱི་མཎྜལ་ལན་གྲངས་མང་པོ་ཕུལ་བའི་རྗེས་ལ་འདི་གནང་། དེ་ལ་བླ་མ་ཆོས་རྡོར་གྱིས་སྤོང་ཐག་ལན་གསུམ་བྱས་པའི་རྗེས་ལ་འདི་གནང་། དེ་གཉིས་ལ་བླ་མ་
1-1-205a
མིད་ལ་རས་པ་ཆེན་པོས་རྔོག་གི་སྐུ་དགྲ་མཐུ་བཏུལ་བ་དང་། བླ་མ་ཆེན་པོའི་སྐུ་མཁར་དགུ་ཐོག་པ་བརྩིགས་པ་ལ་སྒལ་པ་བྱུང་བྱུང་དང་། དེ་ནས་ཀྱང་སྒལ་ཁང་བྱས་ཤིང་བརྡོ་(རྡོ་)བསྐྱས་པ་ལ་སོགས་པའི་དཀའ་བ་ཆེན་པོ་དུ་མ་སྤྱད། ལོ་མང་དུ་བསྟེན། །ལུས་ངག་གི་ཞབས་འབྲིང་དང་མོས་གུས་ཀྱི་མེ་ཏོག་གིས་མཉེས་པར་བྱས་པའི་མཐའ་འདི་གནང་ནས། བླ་མའི་བཀའ་སྤྱི་བོར་བླངས་ཏེ་ཚུལ་བཞིན་བསྒྲུབ་པའི་མཆོད་པས་ཐུགས་དགོངས་རྫོགས་པར་བྱས་པ་ཡིན་ནོ། །དེས་ཐུགས་ཀྱི་སྲས། རས་ཆུང་བས། ཡུན་དུ་བསྟེན་དཀའ་སྤྱད། སྒྲུབ་སྲན། ཤེས་རབ་ཀྱིས་མཉེས་པར་བྱས་པ་དང་། མཉམ་མེད་རིན་པོ་ཆེ་སྐལ་ལྡན་གྱི་སློབ་མ། ཆོས་ཀྱི་རྒྱུད་(བརྒྱུད་)འཛིན་དུ་གཟིགས་ནས་གནང་བ་ཡིན་ནོ། །ལོ་རྒྱུས་སོ། །དེ་ལྟར་བརྒྱུད་པའི་བླ་མའི་ཞལ་གྱི་གདམས་ངག་འདི་ལ། ཇོ་བོ་ཆེན་པོ་ནཱ་རོ་ཏེ་ལོ་པའི་བཞེད་ཀྱིས་དོན་རྣམ་པ་གཉིས། །བར་དོའི་རྣམ་བཞག་བཅའ་བ་དང་། བར་དོ་ཉམས་སུ་བླང་བའོ། །དང་པོ་ལ་དོན་བཅོ་ལྔ་སྟེ། བར་དོ་གསུམ། ལུས་གསུམ། སྔོན་འགྲོ་གསུམ། འཚམས་(མཚམས་)སྦྱོར་གསུམ། བསྲེ་བ་གསུམ་སྟེ་བཅོ་ལྔའོ། །དེ་ལ་དང་པོར་ལ་བར་དོ་གསུམ་ནི། སྐྱེ་ཤི་བར་དོ། །རྨི་ལམ་བར་དོ། །སྲིད་པ་བར་དོའོ། །ལུས་གསུམ་ནི། རྣམ་སྨིན་གྱི་ལུས། བག་ཆགས་ཀྱི་ལུས། ཡིད་ཀྱི་ལུས་སོ། །སྔོན་འགྲོ་གསུམ་ནི། སྐྱེ་ཤི་བར་དོ་ལ་ཆོས་ཐམས་ཅད་རང་བཞིན་གྱིས་འོད་གསལ་བ་སྔོན་དུ་འགྲོ། །རྨི་ལམ་བར་དོ་ལ་གཉིད་ཀྱི་འོད་གསལ་སྔོན་དུ་འགྲོ། །སྲིད་པའི་བར་དོ་ལ་འཆི་ཁའི་འོད་གསལ་སྔོན་དུ་འགྲོའོ། །འཚམས་(མཚམས་)སྦྱར་གསུམ་ནི། སྐྱེ་ཤི་བར་དོ་བླ་མ་མཚན་ཉིད་དང་ལྡན་པ་ལ་བརྟེན་ནས་དབང་གསུམ་པའི་ཉམས་སུ་མྱོང་བས་འཚམས་(མཚམས་)སྦྱོར། རྨི་ལམ་བར་དོ་ལ་མོས་པ་དང་འདུན་པ་དྲག་པོས་འཚམས་(མཚམས་)སྦྱོར། 
1-1-205b
སྲིད་པའི་བར་དོ་ལ་སྐྱེ་བ་ཕྱི་མའི་ཕ་མ་ཡབ་ཡུམ་གྱིས་འཚམས་(མཚམས་)སྦྱོར་རོ། །བསྲེ་བ་གསུམ་ནི། སྐྱེ་ཤི་བར་དོར་འདོད་ཆགས་དང་བསམ་གཏན་བསྲེ། རྨི་ལམ་བར་དོར་གཏི་མུག་དང་བསམ་གཏན་བསྲེ། སྲིད་པ་བར་དོར་ཞེ་སྡང་དང་བསམ་གཏན་བསྲེའོ། །རྣམ་བཞག་གོ། །བར་དོ་ཉམས་སུ་བླང་བའི་མན་ངག་ལ། བླ་མའི་ཞལ་ནས། བར་དོ་རྣམ་པ་གསུམ་དུ་གདམས་ངག་རྣམ་པ་གཉིས་འཆའ་གསུང་། དེ་ཡང་བསྲེ་བ་སྒོམས་(བསྒོམས་)ནས་སངས་རྒྱ་བའི་གདམས་ངག་དང་། འཕོ་བ་མ་སྒོམས་(སྒོམ་)པར་སངས་རྒྱས་པའི་གདམས་ངག་རྣམ་པ་གཉིས་ཡིན་གསུང་། དེ་ལ་དང་པོ་བསྲེ་བ་བསྒོམས་ནས་སངས་རྒྱས་པའི་མན་ངག་ལ། སྐྱེ་ཤི་བར་དོར་རྟེན་བསྐྱེད་པའི་རིམ་པ་ལ་བརྟེན་ནས། དེ་ལ་བརྟེན་པའི་རྫོགས་རིམ་སྟེང་སྒོ་འམ་འོག་སྒོའི་མན་ངག་བསྒོམ། འདོད་ཆགས་དང་བསམ་གཏན་བསྲེ་བ་སྟེ། བླ་མའི་ཞལ་ལས་ཤེས་པར་བྱའོ། །རྨི་ལམ་བར་དོར་གཏི་མུག་དང་བསམ་གཏན་བསྲེ་བ་རྨི་ལམ་འོད་གསལ་གྱིས་གདམས་ངག་བསྒོམ་སྟེ། བླ་མའི་ཞལ་ལས་ཤེས་པར་བྱའོ། །ཨྠཱྀི།། །།
༄། །བསྲེ་བའི་མན་ངག །
༄། །གུ་རུ་ན་མོ། སྐྱེ་ཤི་བར་དོ་དང་། རྨི་ལམ་བར་དོར་རྒྱུད་ལ་སྐྱེས་པའི་ཉམས་མྱོང་དེ་གར་བསྲེ་ན། སྲིད་པའི་བར་དོར་བསྲེ་གསུང་། དེ་ལ་གསུམ། བར་དོ་དང་པོ་འཆི་ཁའི་འོད་གསལ་ལ་བརྟེན་ནས་ཆོས་ཀྱི་སྐུ་ངོས་བཟུང་བ་དང་། བར་དོ་གཉིས་པ་དག་པ་དང་མ་དག་པའི་སྒྱུ་ལུས་ལ་རྟེན་(བརྟེན་)ནས་ཟུང་འཇུག་གི་སྐུ་ངོས་བཟུང་བ་དང་། བར་དོ་གསུམ་པ་སྐྱེ་བའི་སྒོ་གདམ་པའོ། །དེ་ལ་བར་དོ་དང་པོ་འཆི་ཁའི་འོད་གསལ་ལ་བརྟེན་ནས་འོད་གསལ་ཆོས་སྐུ་ངོས་བཟུང་བ་ནི། འཆི་བའི་དུས་སུ་སློབ་དཔོན་ནམ་གྲོགས་མཆེད་ལྟ་བུ་རང་གི་དྲུང་ན་ཡོད་ན། ང་ཤི་བའི་དུས་སུ་ལོང་བྱུང་ན་ཞག་བདུན་ནམ། ཕྱེད་དང་བཞིའི་བར་དུ་རོ་མ་སྒུལ་བར་ཞོག་ཅིག་ངའི་གདམས་
1-1-206a
ངག་གསལ་ཐོབ་ཅིག་བྱ། སྟན་བདེ་བའི་སྟེང་དུ་ལུས་ཅིག་(ཤིག་)བདེ་བར་གནད་ལ་དབབ། སྐད་ཅིག་གིས་ཡི་དམ་གྱི་ལྷར་མོས་པ་བྱ། །སྙིང་ཁར་(གར་)རྩ་པདྨ་འདབ་བཞི་པ་ཅིག་(ཞིག་)བསྒོམ། པདྨའི་ལྟེ་བ་ལ་ཧཱུཾ་འོད་ཟེར་ཁ་དོག་ལྔ་འཕྲོ་བ་ཅིག་(ཞིག་)བསྒོམ། །འདབ་མ་བཞི་ལ་ཨ་ནུ་ཏ་རའི་ཡི་གེ་འབྲུ་བཞི་དགོད། དེ་ནས་འཆི་བའི་ཚེ། འབྱུང་བ་རིམས་ཀྱིས་སྡུད་པའི་དུས་སུ། འཆི་བ་པོ་རང་གིས་མདུན་ཨ་ལ་སེམས་གཏད་པས་ས་ཆུ་ལ་ཐིམ་ནས་འགྲོ། །གྲོགས་ཅིག་(ཤིག་)གིས་ད་ནི་ས་ཆུ་ལ་ཐིམ་ནས་འདུག་གོ་བྱ། །འཆི་བ་པོ་རང་ཉིད་ལ་ད་ནི་ས་ཆུ་ཐིམ་པར་བྱུང་ཨང་སྙམ་པའི་ཤེས་པ་འབྱུང་། སྣང་གྲགས་ཀྱི་ཆོས་ཐམས་ཅད་སྤྲིན་གྱི་རྣམ་པ་ལྟ་བུར་སྐྱ་ལོང་ལོང་འབྱུང་། ནད་གཡོག་པས་ལྟ་རྒྱུ་ལ་རྣ་བ་ཆག་སྣ་ཞོམ། །གདོང་སས་གོས་པ་ལྟར་འགྲོ། །དེ་ནས་ཡང་འཆི་བ་པོས་ནུ་ལ་ཤེས་པ་གཏད་པས། ཆུ་མེ་ལ་ཐིམ་ནས་འགྲོ། །གྲོགས་ཅིག་(ཤིག་)གིས་ད་ཆུ་མེ་ལ་ཐིམ་ནས་འདུག་གོ་བྱ། འཆི་བ་པོ་རང་ལ་ད་ཆུ་མེ་ལ་ཐིམ་པར་འབྱུང་ཨང་སྙམ་པའི་ཤེས་པ་འབྱུང་། སྣང་གྲགས་ཀྱི་ཆོས་འདི་ཐམས་ཅད་དུ་བའི་རྣམ་པ་ལྟ་བུར་སྔོ་ལ་དྭངས་པ་འབྱུང་། ནད་གཡོག་པས་ལྟ་རྒྱུ་ལ་ཁ་ཆུ་སྣ་ཆུ་ལན་ཅིག་ཕྱིར་ལྟུག་གིས་འོང་། །དེ་ནས་སྐམ་སིང་གིས་འགྲོ། །དེ་ནས་འཆི་བ་པོས་ཏ་ལ་ཤེས་པ་གཏད་པས། མེ་རླུང་ལ་ཐིམ་ནས་འགྲོ། །གྲོགས་ཅིག་(ཤིག་)གིས་ད་ནི་མེ་རླུང་ལ་ཐིམ་ནས་འདུག་གོ་བྱ། འཆི་བ་པོ་རང་ཉིད་ལ་ད་ནི་མེ་རླུང་ལ་ཐིམ་པར་བྱུང་ཨང་སྙམ་པའི་ཤེས་པ་ཅིག་(ཞིག་)འབྱུང་། སྣང་གྲགས་ཀྱི་ཆོས་ཐམས་ཅད་སྲིན་བུ་མེ་ཁྱེར་ལྟ་བུའོ། །ནད་གཡོག་པས་ལྟ་རྒྱུ་ལ་ལུས་རྡོ་བ་བཞིན་གྲང་ལྕག་གིས་འགྲོ། །དེ་ནས་ཡང་འཆི་བ་པོས་ར་ལ་ཤེས་པ་གཏད་པས། རླུང་རྣམ་པར་ཤེས་པ་ལ་ཐིམ་ནས་འགྲོ། །གྲོགས་ཅིག་(ཤིག་)གིས་ད་
1-1-206b
ནི་རླུང་རྣམ་པར་ཤེས་པ་ལ་ཐིམ་ནས་འདུག་གོ་བྱ། འཆི་བ་པོ་རང་ཉིད་ལ་ད་ནི་རླུང་རྣམ་པར་ཤེས་པ་ལ་ཐིམ་པར་བྱུང་ཨང་སྙམ་པའི་ཤེས་པ་འབྱུང་། སྣང་གྲགས་ཀྱི་ཆོས་འདི་ཐམས་ཅད་མ་མེའི་རྣམ་པ་ལྟ་བུ་འོང་། །ནད་གཡོག་པས་ལྟ་རྒྱུ་ལ་དབུགས་མི་བདེ་བ་ཤྭ་ཤྭ་བ་འམ། ངར་ངར་བ་འོང་། དེ་ནས་ཡང་དབུས་ཀྱི་ཧཱུཾ་ལ་ཤེས་པ་ལྷན་གྱིས་གཏད་པས། ཕྱི་དབུགས་བད་ཀྱིས་ཆད་ནས་འགྲོ། །གྲོགས་ཅིག་(ཤིག་)གིས་ད་ནི་ཁྱོད་ཀྱིས་ཕྱི་དབུགས་པད་ཀྱིས་ཆད་ནས་འདུག་གོ། །དབུགས་ཀྱི་ཧཱུྃ་ལ་ཤེས་པ་གཏོད་ཅིག །བླ་མའི་གདམས་ངག་གིས་སྐྱེ་ཤི་དང་རྨི་ལམ་ལ་བསྒོམས་པའི་ཉམས་མྱོང་དྲན་པར་གྱིས་ལ། བར་དོ་དང་པོ་ལ་འོད་གསལ་ཆོས་ཀྱི་སྐུ་ངོས་ཟིན་པར་གྱིས་ཤིག་བྱ། དེ་ཡི་དུས་སུ་འཆི་བ་པོ་རང་གི་ཤེས་པའི་ཉམས་ལ་ནི་སྣང་བ་དང་། སྣང་བ་རགས་པ། རགས་པ་ཕྲ་བ། ཕྲ་བ་ཤིན་ཏུ་ཕྲ་བ་ལ་ཐིམ་ནས། ཆོས་ཉིད་ཀྱི་དོན་གཤའ་མ་གཅིག་རྒྱུད་ལ་སྐྱེ། ཤེས་པའི་ཉམས་སྤྲིན་མེད་པའི་ནམ་མཁའ་དྭངས་པ་ལྟ་བུ་འབྱུང་། དེ་ལ་ངོས་ཟིན་ནས་འོད་གསལ་ལ་གོམས་པར་བྱས་པས་དེ་ཉིད་དུ་འབྲས་བུ་ཆོས་ཀྱི་སྐུ་ཐོབ་པ་ཡིན་ནོ། །དེ་ལྟར་ཡང་གུར་གྱི་ལེའུ་བཞི་པ་ནས། དང་པོ་སྤྲིན་དང་འདྲ་བ་ཡིན། གཉིས་པ་དུ་བ་ལྟ་བུ་ཡིན། གསུམ་པ་སྲིན་འབུ་མེ་ཁྱེར་དངོས། བཞི་པ་མར་མེ་གསལ་འབར་བ། །ལྔ་པ་རྟག་ཏུ་སྣང་བ་ནི། །སྤྲིན་མེད་ནམ་མཁའ་ལྟ་བུ་སྟེ། །ཐམས་ཅད་མཁྱེན་པའི་རྒྱུ་ངེས་སྟེ(ཏེ)། དངོས་གྲུབ་ངེས་འཇུག་ཉེ་བ་ཡིན། ཞེས་གསུངས་སོ། །ནད་གཡོགས་པས་ལྟ་རྒྱུ་ལ་ཤི་ནས་འདུག་ཟེར། འཆི་བ་པོ་རང་ལ་སེམས་བག་ཙམ་མི་འཕོ། དེ་ལྟ་བུ་དེ་སེམས་ཅན་ཐམས་ཅད་ཀྱི་རྒྱུད་ལ་སྐྱེ་སྟེ། ད་ལྟར་མ་བསྒོམས་པ་རྣམས་ཀྱིས་ངོས་མི་ཟིན་པ་ཡིན། འོ་སྐོལ་བླ་མའི་གདམས་ངག་ཡོད་པ་
1-1-207a
རྣམས་ཀྱིས། སྐྱེ་ཤི་དང་རྨི་ལམ་གྱིས་(གྱི་)དུས་སུ་བསྒོམས་པའི་ཉམས་སུ་མྱོང་བ་བདེ་སྟོང་གཉིས་མེད་ལ་གོམས་འདྲིས་ཡོད་པས། འཆི་ཀའི་འོད་གསལ་ལ་བརྟེན་ནས། འོད་གསལ་ཆོས་ཀྱི་སྐུ་ངོས་ཟིན་ནས་ཡོང་བ་ཡིན་གསུང་། དེ་ནས་སེམས་ཅན་དོན་དུ་ལུས་ལེན་ན་ཡང་ལེན་དབང་ཡོད་ལ། མི་ལེན་ན་ཡང་མི་ལེན་པའི་དབང་ཡོད་དེ། དེ་ཉིད་དུ་འབྲས་བུ་སྐུ་གསུམ་ཡེ་ཤེས་ལྔ་ལྡན་དུ་སངས་རྒྱ་བ་སྟེ། འབྲས་བུ་ཐོབ་པའོ། །བར་དོ་དང་པོ་འོད་གསལ་ཆོས་ཀྱི་སྐུ་མ་ཐོབ་ན། ད་བར་དོ་གཉིས་པ་དག་པ་དང་མ་དག་པའི་སྒྱུ་ལུས་ལ་རྟེན་(བརྟེན་)ནས་ཟུང་འཇུག་གི་སྐུ་ངོས་བཟུང་བ་ནི། མ་དག་པའི་སྒྱུ་ལུས་བར་དོ་ཡིད་ཀྱི་གཟུགས་ཅན་དེ། དག་པའི་སྒྱུ་ལུས་ཡི་དམ་ལྷའི་སྐུ་བསྒོམས་ནས། རྫོགས་པའི་རིམ་པ་ཟག་མེད་ཀྱི་ཉམས་སུ་མྱོང་བ་དང་ཟུང་འཇུག་ཏུ་བསྒོམ་པ་ཡིན་པས། དེ་ལ་ཟུང་འཇུག་གི་སྐུ་ངོས་བཟུང་བ་ཞེས་བྱའོ། །དེ་ལ་དང་པོ་སེམས་འདི་ལུས་སྒོ་རབ་འབྲིང་ཐ་མ་གསུམ་ནས། འཕོས་ནས་བར་དོ་ལྡང་སྟེ། བར་དོར་ཡིད་ཀྱི་གཟུགས་ཅན་ཞེས་བྱ་སྟེ། རི་མེད་བྲག་མེད་ཁང་ཁྱིམ་མེད་པ་ལ་ཐོག་ཆགས་མེད་པར་ཕྱད་ཕྱད་པ་ཅིག་འོང་སྟེ། སྔོན་བྱུང་སྲིད་པའི་ཤ་གཟུགས་ཅན། །དབང་པོ་ཀུན་ཚང་ཐོགས་པ་མེད། །རྫུ་འཕྲུལ་ལས་ཀྱི་སྟོབས་ཀྱིས་འགྲུབ། །རིགས་མཐུན་ལྷ་མིག་དག་པས་མཐོང་། །ཟེར་བས། དེ་ལྟར་བར་དོར་ཡུན་རིང་ན་ཞག་བདུན་ཚན་བདུན། ཐུང་ན་བདུན་ཚན་གཅིག་གམ་ཇི་ལྟར་རིགས་པ་ཅིག་(ཞིག་)སྡོད་དེ་དེ་ལས་མང་བ་མི་སྡོད། བདུན་ཚན་དང་པོ་ལ་གཉིས་སུ་བྱས་པའི་ཞག་ཕྱེད་དང་བཞི་ཡན་ཆད་འདས་པ་རྗེས་སུ་དྲན་པ་ལ་ངོས་གཟུང་བ་ཞེས་བྱ་སྟེ། སྔར་གྱི་ལུས་སུ་སྣང་བའོ། །དུ་བ་འདི་ཚོ་ངའི་ཉེ་དུ་དང་ཉེ་འབྲེལ་ཡིན་སྙམ་པའམ། ནོར་རྫས་ལ་སོགས་པ་འདི་ཀུན་ངའི་ཡིན་སྙམ་པ་འམ། འདི་ངའི་རོ་
1-1-207b
ཡིན་སྙམ་པའམ། རིགས་དྲུག་གི་སྣང་བ་འཆར་གྱིན་འདུག །ང་ཤི་བ་བྱུང་སྙམ་པ་ངོ་ཤེས་པ་འབྱུང་། དེ་ལ་མ་དག་པའི་སྒྱུ་ལུས་ཞེས་བྱ། དེ་ཡི་དུས་སུ་བླ་མའི་གདམ་ངག་སྐྱེ་ཤི་དང་རྨི་ལམ་ལ་གོམས་པ་དྲན་ནས་ལྷའི་སྐུ་སྒྱུ་མ་ལྟ་བུར་བསྒོམ་པ་ནི་དག་པའི་སྒྱུ་ལུས་ཞེས་བྱ། སེམས་རྫོགས་པའི་རིམ་པ་བསྒོམས་པས་བདེ་ལ་ཟག་པ་མེད་པའི་ཉམས་སུ་མྱོང་བ་དང་། བཅས་པ་རྒྱུད་ལ་སྐྱེ་བ་ནི་ཟུང་འཇུག་གི་སྐུའོ། །དེ་ཅང་སྐྱེའམ་སྙམ་ན་སྐྱེ་སྟེ། ད་ལྟར་གཉིད་དུ་འགྲོ་བ་དང་འཆི་བ་ཆ་འཐུན། རྨི་ལམ་ཟིང་གིས་རྨི་བ་དང་། བར་དོའི་སྣང་བ་འཆར་བ་གཉིས་ཆ་འཐུན། །རྨི་ལམ་ལ་རྨི་ལམ་དུ་ངོ་ཤེས་པ་དང་། བར་དོ་ལ་བར་དོར་ངོ་ཤེས་པ་ཆ་འཐུན། རྨི་ལམ་རྨི་ལམ་དུ་ངོ་ཤེས་པས་ཟག་མེད་ཀྱི་ཉམས་སུ་མྱོང་བ་རྒྱུད་ལ་སྐྱེ་བ་དང་། ཤི་བ་ལ་ཤི་བར་ཤེས་ནས་བར་དོའི་དུས་སུ་ཟག་མེད་ཀྱི་ཉམས་སུ་མྱོང་བ་རྒྱུད་ལ་སྐྱེ་བ་གཉིས་ཆ་འཐུན་པ་ཡིན་གསུང་། དེས་ན་ད་ལྟར་ཉམས་སུ་མྱོང་བ་རྒྱུད་ལ་སྐྱེས་པ་ཅིག་(ཞིག་)གིས། སྲིད་པའི་བར་དོ་ཡང་ཉམས་མྱོང་ངོས་ཟིན་ཞིང་རྒྱུད་ལ་སྐྱེ་བ་ཡིན་གསུང་། ཤི་ནས་བར་དོ་ལ་བར་དོར་ངོ་ཤེས་ཀྱང་བདེ་སྟོང་གི་ངང་ལ་གནས་པར་མ་ནུས་ན། ད་བར་དོ་སྤེལ་བར་བྱ་སྟེ། བར་མ་དོའི་སྣང་བ་གང་བྱུང་བ་དེ་གཅིག་ལས་གཉིས། གཉིས་ནས་བཞི་དང་བརྒྱད་ལ་སོགས་པ་སྤེལ་བའི་གདམས་ངག་བྱ། །དེ་ནས་སྦྱང་བ་ནི་བར་དོའི་སྣང་བ་དེ་རྣམས་རང་གི་ཡི་དམ་ལྷའི་དཀྱིལ་འཁོར་རྟེན་གཞལ་ཡས་ཁང་རྟེན་(བརྟེན་)པ་ལྷ་དང་བཅས་པ་ལྷ་དགུ་འམ་ལྷ་མོ་བཅོ་ལྔ་འམ། དཔའ་བོ་ཅིག་(ཞིག་)པ་ལྟ་བུར་སྣང་ལ་རང་བཞིན་མེད་པ་སྒྱུ་མ་ལྟ་བུའི་སྐུར་བསྒོམ་མོ། །དེ་ལྟར་བསྒོམས་པས་བདེ་སྟོང་གཉིས་སུ་མྱོང་བ་རྒྱུད་ལ་སྐྱེའོ། །དེའི་དུས་སུ་གྲོགས་ཡིད་གཞུངས་པ་ཅིག་(ཞིག་)གིས། ཞག་ཕྱེད་དང་བཞིར་རོ་མི་སྒུལ་བར་བཞག་ལ་སྐབས་སུ་
1-1-208a
རྣ་བ་ན་ཡར་མིང་ནས་འབོད་ཅིང་། བླ་མའི་གདམས་ངག་དྲན་པར་གྱིས་ཞེས་གསལ་གདབ་བོ། །སྔར་གྱིས་མིང་ལུས་གཉིས་དང་བག་ཆགས་ཀྱི་འབྲེལ་ཡོད་པས་མིང་ནས་བོས་པས། ཡིད་མི་བདེ་བ་སྙམ་བྱེད་ནས། སྔར་གྱི་རོའི་དྲུང་དུ་ཕྱིན་པ་དང་། ཡང་ཤི་བ་ལ་ཤི་བར་ཤེས་ནས་སྔར་གྱི་བླ་མའི་གདམས་ངག་དྲན་ནས་ཉམས་མྱོང་རྒྱུད་ལ་སྐྱེས་པ་ཡིན་གསུང་། དེ་ནི་འདས་པ་རྗེས་སུ་དྲན་པ་ངོས་བཟུང་བའོ། །ད་ངོས་ཟིན་ནས་སློབ་པ་དང་མི་སློབ་པའི་ཟུང་འཇུག་གི་སྒོ་ནས་གོམས་འདྲིས་དེའི་ངང་ལ་གནས་ན། དེ་ཉིད་དུ་འབྲས་བུ་སྐུ་གསུམ་ཡེ་ཤེས་ལྔ་ལྡན་སྣང་ལ་རང་བཞིན་མེད་པ་འཇའ་ཚོན་ལྟ་བུའི་སྐུ་ཐོབ་པའོ། །འདས་པ་རྗེས་སུ་དྲན་པ་ལ་ངོས་མ་ཟིན་ན་ཞག་ཕྱེད་བཞི་མན་ཆད་མ་འོངས་པ་རྗེས་སུ་དྲན་ལ་ངོས་འཛིན་པ་ལ། ཞག་ཕྱེད་དང་བཞི་མན་ཆད་ནས་སྐྱེ་བ་ཕྱི་མའི་ཕ་མ་སྙོམས་འཇུག་བྱེད་པའི་སྣང་བ་འོང་བས། ཕོར་སྐྱེ་བ་ལེན་ན་ཕ་ལ་ཞེ་སྡང་སྐྱེ། མ་ལ་འདོད་ཆགས་སྐྱེ། མོར་སྐྱེ་ན་མ་ལ་ཞེ་སྡང་སྐྱེ་ཕ་ལ་ཆགས་པ་སྐྱེ། དེ་ལྟར་ཆགས་སྡང་གཉིས་ཀྱི་རྩ་བ་མ་རིག་པས་བཅིངས་པ་དེ་གཏི་མུག་ཡིན། དེ་ལྟར་དུག་གསུམ་ལ་བརྟེན་ནས་མའི་མངལ་དུ་ཞུགས་ནས་འཁོར་བར་སྐྱེ་བ་ཡིན་གསུང་། དེ་ལྟར་ཡིན་པས་འོ་སྐོལ་གདམས་ངག་ཡོད་པ་དང་དེ་ལས་སྐྱེས་པའི་ཉམས་མྱོང་ཡོད་པས་ཞེ་སྡང་དང་བསམ་གཏན་བསྲེ་བའི་མན་ངག་ལ། ཕ་མ་གཉིས་བླ་མ་ཡབ་ཡུམ་དུ་བསྒོམས་པས་ཆགས་སྡང་མི་སྐྱེ། དེ་ལྟར་བསྒོམས་ཀྱང་། ཆགས་སྡང་གི་སྣང་བ་མི་ཁེགས་པར་འདུག་ན། ཡི་དམ་གྱི་ལྷ་ཡབ་ཡུམ་དུ་བསྒོམས་པས་ཆགས་སྡང་མི་སྐྱེ། དེས་ཀྱང་ཆགས་སྡང་མི་ཁེགས་པར་འདུག་ན། བླ་མ་ཡབ་ཡུམ་འམ་(མམ་)ཡི་དམ་ཡབ་ཡུམ་སྙོམས་པར་ཞུགས་པར་བསྒོམས་ལ། 
1-1-208b
ཐིག་ལེ་དཀར་དམར་བདག་གི་ལྕེ་ཐོག་ཏུ་གཞག་(བཞག་)ནས། གསང་བའི་དབང་བསྐུར་བར་བསྒོམས། །དེ་ལྟར་བསྒོམས་པས་བདག་རང་གི་རྒྱུད་ལ་ཟག་པ་མེད་པའི་ཉམས་སུ་མྱོང་བ་སྐྱེ་ལ་སྐྱེ་བར་བསྒོམ་ཡང་བསྒོམ་མོ། །བླ་མའི་ཞལ་ནས། དེའི་དུས་སུ་ཟག་མེད་ཀྱི་ཉམས་སུ་མྱོང་བ་ཅིག་(ཞིག་)ངེས་པ་ཁོ་ན་སྐྱེ་བ་ཡིན་གསུང་། དེས་མ་འོངས་པ་རྗེས་སུ་དྲན་ལ་ངོས་བཟུང་བའོ། །དེ་ལ་ངོས་ཟིན་ཅིང་ལུས་ལྷའི་སྐུ་འཇའ་ཚོན་གྱི་རྣམ་པ་ལྟ་བུར་བསྒོམས་སེམས་བདེ་སྟོང་ཟུང་འཇུག་སློབ་པ་དང་མི་སློབ་པའི་ཚུལ་གྱིས། དེའི་ངང་འབའ་ཞིག་ལ་གནས་ནུས་ན། ལུས་ལེན་ན་ཡང་ལེན་དབང་ཡོད་ལ། མི་ལེན་ནའང་མི་ལེན་པའི་དབང་ཡོད་སྟེ(དེ)། དེ་ཉིད་དུ་འབྲས་བུ་སྐུ་གསུམ་ཡེ་ཤེས་ལྔ་ལྡན། སྣང་ལ་རང་བཞིན་མེད་པ་འཇའ་ཚོན་ལྟ་བུའི་སྐུ་ཐོབ་བོ་གསུང་ངོ་། །དེས་ནི་བར་དོ་གཉིས་པ་དག་པ་དང་མ་དག་པའི་སྒྱུ་ལུས་ལ་བརྟེན་ནས་ཟུང་འཇུག་གི་སྐུ་ངོས་བཟུང་བའོ། །དེ་གཉིས་ཀྱང་འདས་པ་རྗེས་དྲན་ལ་གཟུང་སླ་བ་ཡིན་ཏེ། སྔ་མའི་ལུས་ལ་བག་ཆགས་ཀྱི་འདྲིས་ཡོད་པ་དང་། གདམས་ངག་གསལ་གདབ་ཏུ་ཡོད་པ་གཉིས་ཀྱི་ནད་ཀས་ཕན་པ་ཡིན་གསུང་། མ་འོངས་པ་ལ་བག་ཙམ་ཀར་འགྲོ། །ཕ་མའི་ཆགས་སྡང་གི་སྣང་བ་དང་། རང་གར་སྐྱེ་བའི་ལུས་དང་ཡུལ་དང་སྐྱེ་གནས་དང་རིགས་དང་ཁ་ཟས་ལ་སོགས་པའི་རྣམ་རྟོག་གསར་པ་མང་པོ་ལྡང་གསུང་། འོ་ན་ཡང་ཉམས་སུ་མྱོང་བ་ཡོད་པ་ཅིག་(ཞིག་)གིས་ཟིན་ནས་ཡོང་གསུང་། བར་དོ་གཉིས་པ་ཟུང་འཇུག་གི་སྐུ་ངོས་མ་ཟིན་ན། ད་གསུམ་པ་མངལ་གྱི་སྐྱེ་གནས་ལ་བཟང་ངན་འདེམ་པ་ལ་དེ་ལ་ད་ལྟ་འོ་སྐོལ་གྱིས་དབང་བསྐུར་ཐོབ་པ་དང་། སྐྱེད་(བསྐྱེད་)རྫོགས་བསྒོམས་པའི་ཉམས་མྱོང་དང་། བཟླས་པ་དང་། གཏོར་མ་དང་། བླ་མ་ལ་མོས་གུས་བྱས་པ་དང་། དེ་
1-1-209a
རྣམས་ཀྱི་སྟོབས་ཀྱིས་རང་གང་མོས་ཀྱི་ལུས་བླང་དབང་ཡོད་སྟེ(དེ)། སྨོན་ལམ་གྱི་འཚམས་(མཚམས་)སྦྱར་ནས་རིགས་ན་ལྷའི་རིགས་བརྒྱ་བྱིན་ལྟ་བུར་སྐྱེ་བར་གྱུར་ཅིག །སྐྱེས་ནས་ཀྱང་དགྱེས་པ་རྡོ་རྗེའི་ཆོས་ལ་ཉན་བཤད་བསྒོམ་བསྒྲུབ་ཉམས་སུ་ལེན་པར་གྱུར་ཅིག །རིགས་ནི་མིའི་རིགས་འཁོར་ལོས་སྒྱུར་བའི་རྒྱལ་པོ་ལྟ་བུར་སྐྱེ་བར་གྱུར་ཅིག །སྐྱེས་ནས་ཀྱང་བཅོམ་ལྡན་འདས་དགྱེས་པ་རྡོ་རྗེའི་ཆོས་ཉན་འཆད་བསྒོམ་བསྒྲུབ་ཉམས་སུ་ལེན་པར་གྱུར་ཅིག་བྱས་ལ་སྨོན་ལམ་གདབ། སྐྱེ་ཞིང་སྐྱེ་བའི་རིགས་མཆོག་ཏུ་ཞེས་པའམ། རིགས་སུ་སྐྱེ་དང་དམ་ཚིག་ཅན་ཞེས་པ་ལ་སོགས་པས། སྨོན་ལམ་གྱི་འཚམས་(མཚམས་)སྦྱོར་བའི་ལུས་བླངས་ལ་སྐྱེ་བ་བརྒྱུད་ནས་སངས་རྒྱས་པར་བྱའོ། །ཨྚྀི། བླ་མ་མར་པའི་གསུང་ལ་རྔོག་གིས་ཟིན་བྲིས་སུ་བགྱིས་པའོ།། །།
༄། །སེམས་གྲོང་འཇུག་གི་མན་ངག །
འཕོ་བ་སྔོན་དུ་འགྲོ་བ་ནི། །རླུང་བུམ་པ་ཅན་གྱི་སྦྱོར་བ་ལ་གོམས་པར་བྱས་ཏེ། རླུང་གི་མཚན་ཉིད་རྗེས་སུ་དྲན་པ་ནི། །ཕྱིར་འགྲོ་བ་རང་ལ་གནོད། །ནང་དུ་འོང་བ་ཕན། །རླུང་བདེ་བའི་དམིགས་སུ་བསྒོམ་པ་ནི། །འགྲོ་འོང་བདེ་བར་བསྒོམ། །རླུང་དགག་པའི་ཐབས་ནི། །བུམ་པ་ཅན་དང་སེང་གེ་རྣམ་གྲོལ་གྱིས་དགག་གོ། །རླུང་ཁེགས་པའི་ཚད་ནི་པུས་མོ་ལ་བསྐྱོད་ཅིང་སེ་གོལ་གསུམ་གསུམ་གདབ་བརྒྱ་རྩ་བརྒྱད་དོ། །རླུང་གི་རྗེས་སུ་འགྲོ་བ་ནི། །གཏོང་དུས་སུ་ཕར་འགྲོ་ཚུར་འགྲོ་ཁ་དོག་ཏུ་བསླབ་བོ། །འཕོ་བ་སྦྱང་བ་ནི། ལུས་བཅོས་ལ་སྒོ་བཀག་ལ། ཉི་ཤུ་རྩ་ཅིག་(གཅིག་)གིས་ཡར་དྲང་མར་བཏེག་གོ། །འཕོ་བ་དངོས་ནི། །ལུས་ཁམས་སྙོམས་ཙམ་ན། ཕྱི་ནང་གཉིས་ཀའི་འཆི་ལྟས་བྱུང་ནས། རླུང་བུམ་པ་གང་བའི་སྦྱོར་བ་ལ་དབུགས་ཀྱིས་མས་ཞར་ཕུལ། ཚངས་པའི་ཡུ་ག་ཧར་གྱིས་བཏང་ལ། ཧིག་གིས་དྲངས་ནས་ཚངས་པའི་བུ་ག་ནས། རང་གར་སྐྱེ་བར་
1-1-209b
འདོད་པའི་གནས་དེར་དམིགས་པ་བྱས་ལ། ཧིག་ཀ་ཉི་ཤུ་རྩ་ལྔས་འཕང་ལ་གཏང་ངོ་། །དེ་ལྟར་འཕངས་པས་སྡིག་པོ་ཆེ་ཡང་གཟུགས་མེད་ཀྱི་ལྷར་སྐྱེའོ། །དེ་ལ་འཆི་ངེས་ན་དེའི་གོང་དུ་འཕོ་བའོ། །དེ་ལ་འཕོ་བའི་དུས་སུ་གོང་དུ་བསྒོམ་པ་ལྟར་བྱས་ཏེ། སྐེད་པ་ཅུང་ཞིག་ཉེག་ཉེག་བྱས་ནས། གྲུ་མོས་རྩིབ་ལོགས་ཅུང་ཞིག་མནན་ཏེ། རླུང་དྲག་པོར་གྱེན་དུ་དྲངས་ཏེ། འཕོས་པས་ཚངས་པའི་སྲུབས་ཕྱེད་ཏེ(དེ)། ཤེས་པ་དང་རླུང་གཉིས་མཁའ་སྤྱོད་དུ་ངེས་པ་ཁོ་ནར་འགྲོའོ། །ཡང་དེ་བཞིན་དུ་བསྡད་ནས། གཡོན་པའི་ལག་པ་གཡས་པས་བཟུང་བའི་ཕྱག་རྒྱ་བྱ་སྟེ། ཧཱུཾ་ཅེས་(ཞེས་)པས་རླུང་ཕྱུང་སྟེ། སྐར་མ་མཐོང་དུ་ཉེ་བའི་བར་ཙམ་དུ་དབྱུང་ཞིང་། མ་ནུས་ན་སྣ་ནས་བག་ཙམ་རྔུབ་བོ། །དེ་ལ་གོམས་པ་དང་། ལག་ཐིལ་དུ་རས་བལ་ལམ། ཤིང་བལ་བཞག་སྟེ། དེ་ལའང་འབྱིན་པའི་རླུང་རྡེག །དེ་འགུལ་ནས་ཕར་བ་གཡོ་བ་དང་། དེ་བས་རེངས་པར་བསྣུར་ཞིང་བྱའོ། །དེ་ནས་སྦྲང་འབུའི་རོ་ལ་དེ་ལྟར་བསླབ་སྟེ། འགུལ་པ་དང་གྲོང་གཞན་དུ་རྣམ་ཤེས་འཇུག་ནུས་པའོ། །དེ་ལ་རང་ཉིད་ཀྱི་ལུས་འདི་རྒས་ཏེ་བསྒོམ་མི་ནུས་ན། རྨ་མེད་པའི་རོ་མ་རུལ་མ་སུངས་པ་བླངས་ཏེ། ཁྲུས་བྱས་གོས་བཀོན་བརྒྱན་བརྟགས་(རྒྱན་བཏགས་)ནས་རང་གི་ཁ་མར་བསྐྱོར་ནས། རང་གི་སྣ་གང་ནས་རླུང་རྒྱུ་བ་དང་རོའི་གཡོན་པ་སྤྲད་དེ། འབྱིན་པའི་རླུང་གིས་ཤེས་པ་དང་རླུང་གཉིས་དྲག་པོར་སྣ་གཡོན་པ་ནས་རོའི་སྙིང་དཀྱིལ་འཁོར་དུ་ཞུགས་པར་བསམ་ཞིང་། ཤེས་པ་དང་རླུང་གཉིས་ཚུར་ལུས་རྒད་པོ་ལ་མི་བསམ་མི་དྲང་བར་འཕོས་བས། ཕ་རོལ་པོའི་རོ་ལངས་ཏེ་རང་ཤི་ནས་འགྲོའོ། །དེ་ནས་ཡང་བསྒོམ་པར་བྱའོ། །དེ་ལ་སེམས་ཀྱི་འཕོ་བ་གྲོང་ཁྱེར་དུ་འཇུག་པའི་མན་ངག་ནི་འདི་ཤེས་པར་བྱ་སྟེ། དང་པོ་རྣལ་འབྱོར་པས་ཆོས་ཐམས་ཅད་སྒྱུ་མ་དང་ཁྱད་པར་མེད་པའི་དོན་ལ་
1-1-210a
མོས་པ་དྲག་པོ་བྱས་ཏེ། དེ་ནས་རང་གི་ཁྱིམ་དུ་མ་འདལ་ལེགས་པར་བྱུགས་ཏེ། ཐོད་པའམ་གཡམ་པ་ལ་རྩི་ནག་གུ་བྱུགས་ལ། དབུས་སུ་ཧཱུྃ་དཀར་པོ་གསལ་བར་བྲིས་ལ། མ་ཌལ་གྱི་ཐོག་དུ་(ཏུ་)བཞག་ཏེ་རང་གི་ཤེས་པ་སྙིང་ཁར་ཧཱུྃ་ལ་གཏད་པར་བྱས་ལ། དེ་ནས་རང་གི་ཤེས་པ་ཧཱུྃ་ལ་གཏད་དེ་དྲག་དུ་(ཏུ་)བཟུང་ངོ་། །དེ་ནས་ཟིན་པའི་རྟགས་ནི་ཐོད་པ་དྲོ་བའམ། འགུལ་བའམ། འཕར་བའམ། དུ་བའི་རྟགས་འོང་ཏེ་དེའི་རྗེས་མི་ཤི་ནས་རིང་པོ་མ་ལོན་པ། རོ་མ་རུལ་བའི་སྨ་མེད་པ་དེ་བླངས་ལ། ཁྲུས་བྱས་ཏེ་བརྒྱན་(རྒྱན་)ཆ་རྟགས་ལ་ཡིད་འཇུག་པར་བྱ་སྟེ། མ་ཌལ་གྱི་ཐོག་ཏུ་བཞག་སྟེ། རོའི་སྙིང་ཁར་(གར)ཧཱུྃ་བསམ་ལ། དེ་ལ་ཤེས་པ་གཏད་དབུགས་ཐུབ་ཚད་བཟུང་ངོ་། །དེ་ནས་རླུང་དང་ཤེས་ཕ་རོལ་ཟིན་ནས་དགའ་བ་སྐྱེ་ཞིང་འདུག་ཙམ་ན། ཤེས་པ་རོའི་སྙིང་ཁའི་(གའི་)ཧཱུྃ་ལ་ཤེས་པ་ཧྲིལ་ཙེར་གཏད་དེ་ཤེས་པ་བཅུག་ལ་ཚུར་ལ་མི་དྲང་བར་རོ་དེ་བླངས་ལ་ལུས་བོར་རོ། །དེ་ནི་རང་གི་རླུང་གཙོ་བོར་གྱུར་པ་དང་། མོས་པ་དང་། དད་པ་དང་། རྩོལ་བ་དྲག་པོ་དང་། སྣང་སྲིད་སྒྱུ་མ་ཙམ་དུ་ཡིད་ཆེས་པས། ཇི་ལྟར་ཡང་བཏུབ་སྙམ་པ་ལས་འབྱུང་བ་ཡིན་ཏེ། སེམས་གྲོང་དུ་འཇུག་པའི་མན་ངག་གོ། །དེ་ནི་ཆོས་ཀྱི་ཕྱག་རྒྱ་བདག་བྱིན་གྱི་བརླབ་པ་ལས། མན་ངག་བཞིར་བྱུང་བའོ། །བླ་མ་མིད་ལ་ཐོས་པ་དགའི་གདམ་ངག །རྣལ་འབྱོར་པས་རས་ཆུང་པ་ལ་གནང་བ། {ཨྟེེ།} རབ་ཏུ་གསང་བར་བྱའོ།། །།
༄། །བཙན་ཐབས་སུ་འཕོ་བ།
༄། །དེ་ལ་བརྩན་(བཙན་)ཐབས་སུ་འཕོ་བ་ནི། རྐང་པ་གཡོན་པའི་ཕྱི་གཏིང་གིས་བཤང་སྒོ་དགག་ལོང་བུས་རྩ་སྒོ་མནན། དེ་ནས་སེང་གེ་རྣམ་བསྒྱིངས་ཀྱི་ཕྱག་རྒྱས་རྩེའུ་ཆུང་གཉིས་དང་། མིག་ལ་སོགས་པ་མནན། འོག་སྒོ་བསྡམས་ཞིང་རླུང་བུམ་པ་ཅན་དུ་བྱའོ། །དེ་ནས་མ་ཐུབ་ན། གྲུ་མོ་གཉིས་ཀྱིས་མཆན་འོག་གི་རྩིབས་ལོགས་གཉིས་
1-1-210b
གཉིས་བསྡམས། སྐེད་པ་ཉག་ཉག་པོར་བྱས་སྟེ(ཏེ)། རླུང་དྲག་པོར་གྱེན་དུ་དྲངས་ཏེ་ཕུལ་བ་ན་ཡང་། རླུང་དང་ཤེས་པ་གཉིས་ཀྱིས་ཚངས་པའི་བུ་ག་ནས་འཕོས་ཏེ། མཁའ་སྤྱོད་དུ་འགྲོ་བའོ། །འཕོ་བ་འདི་ཀུན་དུས་ནམ་དགའ་དགར་བྱར་མི་རུང་སྟེ། རང་གི་ལུས་ཀྱི་ལྷ་བསད་ན་འཚམས་(མཚམས་)མེད་པ་དང་རྩ་ལྟུང་བྱུང་ནས་ངན་སོང་དུ་ལྟུང་ངོ་། །འཆི་ངེས་ན་གོང་རོལ་དུ་བྱའོ། །ཁྱད་པར་དུ་བཙན་ཐབས་ཀྱི་འཕོ་བ་འདི་སྡིག་པོ་ཆེ་སྔོན་དུ་ཚོགས་མ་སགས་(བསགས་)པ་ལ་བྱའོ། །
༄། །དེ་ཁོ་ན་ཉིད་ཀྱི་འཕོ་བ།
དེ་ཁོ་ན་ཉིད་ཀྱི་འཕོ་བ་ནི། རང་ཉིད་ཡི་དམ་ལྷར་བསྒོམས་པའི་སྙིང་ཁའམ་(གའམ་)ལྟེ་བར། པད་ཟླ་ལ་ཧཱུྃ་བསམས་ཏེ། དེའི་འོད་ཀྱིས་སྣང་སྲིད་ཐམས་ཅད་རང་གི་སྐུ་ལ་བསྡུ། སྐུ་ཡང་ཧཱུྃ་དང་ཟླ་བ་ལ་བསྡུ། ཟླ་བ་ཡང་ཧཱུྃ་ལ་བསྡུ། ཧཱུྃ་ཡང་རིམས་ཀྱིས་ཞབས་བསྐྱེད་ན་དའི་བར་དུ་བསྡུ། མཐར་དབུགས་ཆད་པ་དང་དུས་མཉམ་དུ་ན་ད་ཡང་མི་དམིགས་པར་བྱའོ། །ཐང་ལོ་པ། ཤིང་ལོ་པ། ཀ་ན་རི་པས་གསུངས་སོ།། །།
༄། །རྨི་ལམ་ལམ་དུ་འཁྱེར་གྱི་གདམས་པ།
དང་པོར་མི་(རྨི་)ལམ་ལམ་དུ་འཁྱེར་བ་ལ་དོན་བཞི་སྟེ། དང་པོར་རྨི་ལམ་བཟུང་བ་དང་། དེ་ནས་སྦྱང་བ་དང་། དེ་ནས་སྒྱུ་མར་བསླབ་ཅིང་ཡ་ང་བ་སྤང་བ་དང་། དེ་ནས་དེ་ཁོ་ན་ཉིད་བསྒོམ་པའོ། །དེ་ལ་དང་པོར་བཟུང་བ་ནི། དད་པ་དང་བརྩོན་འགྲུས་དང་། འདུན་པ་དྲག་པོ་གལ་ཆེ་སྟེ། དེ་ཡང་སྲོད་ལ་སྨིན་ཕྲག་ཏུ་ཐིག་ལེ་ལ་ཤེས་པ་གཏད་དེ། སྲོད་ལ་གཉིད་འཐུག་པར་ལོག་གོ། །དེ་ནས་ཐོ་རངས་ཀྱི་དུས་སུ་མདང་རྨི་ལམ་འདྲ་བ་བྱུང་བ་ན། དེའི་དུས་སུ་ཡང་འདི་ལྟར་བསམ་ཏེ། རྨི་ལམ་ཡིན་ཀྱང་མ་ཤེས་སྙམ་པའི་བསམ་པ་དྲག་དུ་(ཏུ་)བྱ་སྟེ། སྣང་སྲིད་འདི་ཐམས་ཅད་རྨི་ལམ་དང་འདྲ་བའི་ཤེས་པ་བྱས་ལ། དེ་ནས་ནི་བདག་གིས་རྨི་ལམ་ལ་རྨི་ལམ་དུ་ཤེས་པར་བྱ་སྙམ་པའི་དྲན་པ་འམ་འདུན་པ་འམ། འདུན་པ་དྲག་པོ་བྱ་སྟེ་གཉིད་ལོག་གོ། །དེ་ནས་ནང་པར་ཉིན་མོའི་དུས་སུ་ཡང་
1-1-211a
ཇི་ལྟར་ཡང་བྱེད་ཅིང་ཅི་མཐོང་བ་ཐམས་ཅད་ལ་རྨི་ལམ་ཡིན་ནམ་སྙམ་པའི་བསམ་པ་ཡང་དང་ཡང་དུ་དྲག་ཏུ་བྱའོ། །དེ་བཞིན་ཉིན་མཚན་དུ་བྱས་པ་རྨི་ལམ་ཟིན་དུ་འོང་སྟེ། རྟགས་ནི་མི་འཚམ་པ་སྣ་ཚོགས་པ་དག་འབྱུང་སྟེ། ཆུ་ཆེན་པོ་མཐོང་བ་དང་། མེ་ཆེན་པོ་མཐོང་བ་དང་། གཡང་ལ་འགྲོ་བ་དང་། ཁྱིས་དེད་པ་རྨི་བ་དང་། རང་གི་ལུས་འོད་བྱུང་བ་རྨི་བ་དང་། དེ་ལ་སོགས་པ་སྣ་ཚོགས་པ་འོང་སྟེ། དེའི་རྐྱེན་གྱིས་རྨི་ལམ་ཡིན་སྙམ་པ་འགའ་འབྱུང་སྟེ། དེ་ནས་རྨི་ལམ་ཡིན་སྙམ་པ་བྱུང་ནས། སྔར་བླ་མས་མན་ངག་ཅི་བྱས་པ་དེ་བརྗོད་ཀྱང་། དེའི་དུས་སུ་ངན་ངག་གསར་པ་དྲན་ཏེ་འོང་སྟེ། དེ་ནས་ཇི་ལྟར་དྲན་པ་བཞིན་བསྒོམ། རྨི་ལམ་གྱི་དུས་སུ་ཆོས་ཐམས་ཅད་རྨི་ལམ་དང་འདྲའོ་ཞེས་བཤད་པ་དེ་རེ་བདེན་སྙམ་པའི་ཤེས་པ་དྲག་པོ་འབྱུང་སྟེ། ནང་པར་རྨི་ལམ་དྲན་པར་བྱས་ཏེ། མདང་གི་དེ་དང་ད་ལྟར་གྱི་སྣང་བ་འདི་ལ་ཁྱད་ཅི་ཡོད་སྙམ་པའི་འདུན་པ་དྲག་པར་བྱ་སྟེ། དེ་ནི་རྨི་ལམ་གཟུང་བའོ། །དེ་ནས་རྨི་ལམ་ཟིན་ནས་སྲོད་ཀྱི་དུས་རེད་ནས། རྨི་ལམ་རྨི་ལམ་དུ་ཤེས་པར་བྱའོ་སྙམ་པའི་བསམ་པ་དྲག་ཏུ་བྱའོ། །དེའི་དུས་སུ་རྨི་ལམ་སྦྱང་བ་ནི། རྨི་ལམ་ཡིན་པས་ཇི་ལྟར་བྱས་ཀྱང་གཏུབ་(བཏུབ་)སྙམ་པའི་བསམ་པ་བྱ། རྨི་ལམ་གྱི་དུས་ཆུར་མཆོངས་བ་དང་། མེར་མཆོངས་བ་དང་། གཡང་ལ་འགྲོ་བ་དང་། སུམ་ཅུ་རྩ་གསུམ་ལྷའི་གནས་ལྟ་བ་དང་། རྒྱ་གར་གྱི་ཡུལ་ཐམས་ཅད་ལྟ་བ་དང་། ཉི་མ་དང་ཟླ་བ་རྟོགས་པས་མནན་པ་དང་། རང་སེམས་ཀྱི་ཅི་མནོ་བ་ཐམས་ཅད་བྱའོ། །དེ་ནི་རྨི་ལམ་སྦྱང་བའོ། །དེ་ནས་རྨི་ལམ་སྒྱུ་མར་ཤེས་པར་བྱེད་ཅིང་ཡ་ང་བ་སྤངས་པ་ནི། སྦྱོང་བའི་དུས་སུ་ཆུར་མཆོངས་པ་ལ་སོགས་པ་བྱས་པས། ད་དུང་དུ་བག་ཚ་ཞིང་ཡ་ང་བ་སྙམ་
1-1-211b
བྱེད་ན། རྨི་ལམ་ཡིན་པས་ན་འཁྲུལ་པ་སྒྱུ་མ་ཙམ་ཡིན་ཏེ། དེ་ལ་འཇིགས་སུ་ཅི་ཡོད་སྙམ་ནས་ཡ་ང་བ་མེད་པར་བྱའོ་དེ་ནི་རྨི་ལམ་སྒྱུ་མར་ཤེས་པར་བྱེད་པའོ། །དེ་ནས་རྨི་ལམ་དེ་ཁོ་ན་ཉིད་བསྒོམ་པ་ནི། རྨི་ལམ་ཡིན་པས་བྱང་དུ་ཡང་ཅི་ཡོད། དེ་ཡང་སེམས་ཀྱི་འཁྲུལ་པར་ཤེས་པར་བྱ་སྟེ། དེ་ཁོ་ན་བསྒོམ་མོ། །དེ་ལ་བསྒོམ་ཐབས་ནི། རང་ལ་སྔར་གྱིས་བསྒོམ་པའི་ཐབས་ཡོད་ན་གང་ན་གང་འདྲ། མེད་ན་རང་གི་དྲང་ངམ་སྨིན་མཚལ་ལས་སམ། གསང་བའི་ཐིག་ལེ་འམ། གང་ཡང་རུང་བ་ར་ཤེས་པ་གཏད་དེ། བདེ་སྟོང་དུ་མོས་པ་བྱས་པ་ཙམ་གྱིས་ཤིན་ཏུ་བདེ་བ་ཆེ་བར་འབྱུང་ངོ་། །དེའི་དུས་ཀྱི་སྒོམ་པ་བཟང་པོ་དེས། དུས་ཀྱི་སྣ་རྩེ་དཔེ་བྱས་ལ། ཉིན་པར་གྱིས་དུས་སུ་ཡང་སྒོམ་པས་དེ་ཁོ་ན་རྟོགས་པ་ལྷག་པར་ཆེ་བ་འབྱུང་ངོ་། །ཁོ་ན་བསྒོམ་པའོ། །དེ་ནི་རྨི་ལམ་དེ་ནི་རྨི་ལམ་དུ་འཁྱེར་བ་སྟེ། ཚེ་འདི་ལ་བསླབ་པའོ། །ཨྠྀི།། །།
༄། །འཕོ་བ་སྦྱོང་བ།
འཕོ་བ་དངོས་ནི་ཞག་བདུན་ནམ། ཟླ་བ་ཕྱེད་ཅི་རིགས་པར་སྤྱད་དེ། དང་པོར་རྐང་མཐིལ་གཉིས་སུ་ཡུམ་གཉིས། མཆན་ཁུང་གཉིས། གློ་གཉིས། སྙིང་ཁར་ཡུམ་དམར་མོ་བཞིས་བསྐོར། ལྟེ་བར་སེམས་ཀྱི་རྒྱལ་པོ་མ་བཤད་བསམ། སུམ་གྱི་མེས་ལུས་དྲོས། རླུང་བུམ་པ་གང་བ་ལ་ལུས་ཀྱིས་རླུང་གིས་མས་ཕུལ། ཧིག་གིས་གྲངས་ནས་ཚངས་པའི་བུ་གར་འཕངས་ལ་གཏད་དོ། །དེ་ལྟར་རླུང་སྦྱངས་ལ་གསང་སྦྱོར་ནས། བུམ་པ་སྔོན་དུ་བརྩམ་ནས་ནི། །ཉི་ཤུ་རྩ་གཅིག་དབུགས་དག་གིས། །གནས་ནས་དྲག་ཏུ་དྲངས་ནས་སུ། །ཚིགས་གཅིག་ནས་ནི་ཚིགས་གཅིག་གོ། །ཡར་སློག་མར་སློག་ས་བོན་གྱིས། །སྦྱང་བ་ཡི་གེ་ཕྱེད་དང་གཉིས། །ང་རོ་དྲག་ཏུ་བརྗོད་པ་ཡིས། །དུས་ལ་བབ་ན་བཏང་བར་བྱ། །གཞུང་ཚིགས་ན་སར་པདྨའི་འཁོར་ལོ་ཉི་ཤུ་རྩ་
1-1-212a
གཅིག་བསམ། དེ་ཚེ་པདྨའི་སྐུད་པ་ལ་བརྒྱུས་པའོ། །དེའི་དུས་སུ་ཧིཀ་ཀ་ཅེས་དྲག་ཏུ་བརྗོད། ཧིག་རེ་རེ་ཞིང་ཨ་དེ་པདྨ་དེར་སྐུད་པ་ལ་འཁྲིད་ནས་འཛེགས་པར་བསམ། ཉི་ཤུ་རྩ་གཅིག་གིས་ཐ་མ་ལ་ཨ་དེ་པདྨ་དང་པོའི་ཁར་ཐོན་པར་བསམ། དེ་ལས་ཉི་ཤུ་རྩ་གཅིག་དུ་(ཏུ་)རྒལ་ན་འཆིའོ། །ཡང་མར་ཐུར་ལ་དབབ། དེ་ལས་ཡར་རྒལ་དུ་མི་གཞུག །ཡི་གེ་ཡང་གོང་འོག་སྤོས་ཏེ། ཀ་ཧི་ཀ་ཅེས་དྲག་ཏུ་བརྟེག་གོ། །དེ་བཞིན་དུ་ཨ་དེ་ཡར་འདྲེས་མར་རྟིག་བྱས་ལ། སྒོམས་པས་ཐ་མ་ལུས་ཁོང་སྟོང་དུ་བསམ། སྤྱི་བོ་ཚངས་པའི་བུ་ག་དབྱེ། དེའི་རིམ་པས་ཡར་དྲངས་པས། ཧིག་བྱས་པའི་ཐོགས་ལ་པདྨའི་སྐུད་པ་ཆད་ནས་ཨ་དེ་འཇུས་ནས་ཡི་དམ་ལྷའི་སྦུབས་སུ་ཞུགས་ནས། ཞིང་ཁམས་གང་འདོད་སར་སྐྱེའོ། །སློབ་ན་བཅུ་བདུན་སྦྱོང་ཙམ་ན་ཉི་ཤུ་རྩ་གཅིག་ལས་འདས་པར་དྲངས་ན་འཆི་ངེས་སོ། །ཚེ་ལ་གནོད་པ་ཉི་ཤུ་རྩ་གཅིག་ལས་མང་དུ་མི་བགྲང་ངོ་། །རྣལ་འབྱོར་པ་ནི་བདེ་བ་ཅན་ལ་སོགས་པར་རང་གང་འདོད་ཀྱི་ཞིང་ཁམས་དང་། ལྷ་དང་བྱང་ཆུབ་སེམས་དཔའི་གཟུགས་ཀྱི་ཆོས་ཉན་པར་ངེས་པར་སྐྱེས་སོ།། །།
༄། །ར་ས་ནཱའི་བཅུད་ལེན།
༄། །དཔལ་རྡོ་རྗེ་མཁའ་འགྲོ་མ་རྣམས་ལ་ཕྱག་འཚལ་ལོ། །ཨོ་རྒྱན་གྱི་རྣལ་འབྱོར་མ་ལྷན་ཅིག་སྐྱེས་པ་གྲུ་བ་མ་རྣམས་ཀྱིས་བཀའ་བཀྲོལ་ནས་གདམས་པས། རླུང་སེམས་གཉིས་མེད་ཀྱི་གནད་འདི་ལ་དྲུག་སྟེ། དེ་ཡང་རྣལ་འབྱོར་བླ་ན་མེད་པའི་རྒྱུད་ཀྱི་རྒྱལ་པོ་ཐམས་ཅད་ནས། རྭ་ས་ཡ་ན་ཞེས་གསུངས་པ་ལ། རྭ་སའི་སྒྲས་བཅུད་ནི་ལུས་སྒྲུབ་པ་སྟེ་ཐུན་མོང་གི་དངོས་གྲུབ་བོ། །ཡཱ་ནི་སྒྲས་ལེན་པ་ནི་སེམས་སྒྲུབ་པ་སྟེ་མཆོག་གི་དངོས་གྲུབ་བོ། །དེ་ལ་ལུས་བསྒྲུབ་པ་ནི་གསུམ་སྟེ། ན་བ་དང་། རྒ་
1-1-212b
བ་དང་། འཆི་བ་འཆིང་བའོ། །དེ་རེ་རེ་ལའང་གཉིས་གཉིས་ཏེ། རྫས་ཀྱི་དང་རྩ་ཡི་སྦྱོར་བའི་ཆོ་གའོ། །དང་པོ་ལ་གསུམ་སྟེ། སྨན་གྱི་སྦྱོར་བ་དང་། བདུད་རྩི་གཉིས་ཀྱི་སྦྱོར་བ་དང་། བདུད་རྩི་ལྔའི་སྦྱོར་བ་བརྟན་པའོ། །གཉིས་པ་ལའང་གསུམ་སྟེ། རྩ་གཉིས་བཅིང་བའི་སྦྱོར་བ་དང་། རླུང་བསྡོམས་པ་དང་། ཁམས་གཉིས་གྲམ་པའི་འཁྲུལ་འཁོར་རོ། །འདི་རྣམས་ལས་སུ་རུང་བས་ནི་ན་བ་འཆིང་ངོ་། །བསྟན་པས་ནི་རྒ་བ་འཆིང་ངོ་། །གྲུབ་པས་ནི་འཆི་བ་འཆིང་ངོ་། །སེམས་སྒྲུབ་པ་ནི་གསུམ་སྟེ། རྩ་དང་རླུང་དང་བྱང་ཆུབ་ཀྱི་སེམས་སྐྱེད་པ་འཆིང་བའོ། །རྩའི་སྐྱེ་བ་འཆིང་བ་ལ་གཉིས། རྒྱུ་ལྟ་སྟངས་གྲུབ་པ་དང་། འབྲུ་བསམ་གཏན་ནོ། །རླུང་གི་སྐྱེ་བ་འཆིང་བ་ལ་གཉིས། རྒྱུ་རླུང་སེམས་གཉིས་མེད་འཛིན་པ་དང་། འབྲུ་བུམ་པ་ཅན་གྱི་རྣལ་འབྱོར་རོ། །བྱང་ཆུབ་སེམས་ཀྱི་སྐྱེ་བ་འཆིང་བ་ལ་གཉིས། རྒྱུ་འཆིང་བྱེད་ཐབས་ཀྱི་མེ་ལོང་བརྟེན་པ་དང་། འབྲུ་ལྷན་ཅིག་སྐྱེས་པའི་ཡེ་ཤེས་སོ། །རླུང་སེམས་དབྱེར་མེད་དོ།། །།དཔལ་རྡོ་རྗེ་མཁའ་འགྲོ་མ་རྣམས་ལ་ཕྱག་འཚལ་ལོ། །གདམས་པ་འདི་ནི་སྔོན་བཅོམ་ལྡན་འདས་མྱ་ངན་ལས་འདས་པའི་འོག་ཏུ། ཨོ་རྒྱན་གྱི་ཡུལ་ག་ལ་བ་དེར། རྣལ་འབྱོར་བླ་ན་མེད་པའི་རྒྱུད་ཐམས་ཅད་བསྡུས་ཤིང་བརྟན་པ་ལས་དེ་ཡི་ནང་ནས་མཆོག་ཏུ་ཟབ་པ་སྙིང་པོ་ལྟ་བུར་ཕྱུང་བ་འདི་ནི། ལྷན་ཅིག་སྐྱེས་པ་གྲུབ་པའི་རྣལ་འབྱོར་མ་རྣམས་བཀའ་བསྒྲོས་ཏེ། ཕྱི་མའི་རྣལ་འབྱོར་པ་རྣམས་ཀྱི་དོན་དུ་བཀའ་བཀྲོལ་ནས་རླུང་སེམས་དབྱེར་མེད་ཀྱི་གནད་ཌ་ཀིའི་བཀའ་བབས་བརྡ་དོན་དྲུག་པ་འདི་སྙན་བརྒྱུད་དུ་རྗེས་སུ་གདམས་པའོ།། །།ན་མོ་ཤྲཱི་བཛྲ་ཡོ་གི་ནི། རྣལ་འབྱོར་ཆེན་པོའི་རྒྱུད་ཐམས་ཅད་ལས། རྭ་ས་ཡ་ན་བཅུད་ཀྱི་ལེན་གསུངས་པའི་དོན་ནི། མཁའ་འགྲོ་མའི་བཀའ་དྲུག་པོ་འདི་ཡིན་ཏེ། ར་
1-1-213a
སཱའི་དོན་བཅུད་ཀྱི་ལུས་སྒྲུབ་པ་སྟེ་མཐོ་རིས་སྒྲུབ་པའོ། །ཡ་ནའི་དོན་ལེན་པ་ནི་སེམས་སྒྲུབ་སྟེ། ཐར་པ་སྒྲུབ་པའོ། །དེ་ལ་ལུས་སྒྲུབ་པ་ནི། རྒས་པ་དང་། ན་བ་དང་། འཆི་བ་འཆིང་བའོ། །དེ་ཡང་འདི་ལྟར་ལུས་ངག་སེམས་ཀྱི་གཡེང་བ་ཐམས་ཅད་སྤང་། བཟའ་བཏུང་ཚད་ལས་རྒལ་བ་དང་། སྤྱོད་ལམ་དྲག་ཤུལ་ཅན་ངལ་ཞིང་དུབ་པའི་མཐར་ལྷུང་བ་མཐའ་དག་དོར། ཆུ་མའི་སྲིང་། དུས་བཞིའི་སྤྱོད་ལམ་ཆ་སྙོམས་པས། ནང་གི་འབྱུང་བཞི་རེ་སྙོམས་པའི་བདེ་བ་འཕེལ་བ་ལ་བསླབ་བོ། །དངོས་གཞི་ནི་སྟེང་འོག་གི་བཙན་ཐབས་ཀྱི་སྦྱོར་བ་སྒྲུབ་པ་སྟེ། སྟེང་གི་སྣ་སྒོ་རས་བལ་གྱིས་དགག་གོ། །དེ་ཡང་ཉིན་བཞིན་གཡས་དང་། མཚན་བཞིན་གཡོན་པ་དམ་དུ་དགག་པའོ། །སྲིན་པོའི་སྒོ་བཅིངས་པ་ཞེས་བྱ་སྟེ། རས་ཆག་ཕྲན་གྱིས་སྤུས་ནི་གུའི་མཚམས་སུ་བསྡོད་ལ་ཡར་གྱེན་དུ་ཕྱོགས་ན་རྐེད་པ་ལ་བཀྲིས་ལ། རྒྱུ་ཞབས་སུ་སྟག་སྐོར་ཅི་བྱས་ཏེ་འདོམ་ན་མར་འཐེན་པ་རྒྱབ་ཀྱི་རྩིགས་པའི་ངོས་ལ་ཡར་འཐེན་པས་བཤང་གཅིའི་སྒོ་གཉིས་དམ་དུ་བསྡམ་མོ། །ཟག་པ་འདོར་བའི་ཚེ་བསལ་བར་བྱའོ། །དུས་ཐམས་ཅད་དུ་འོག་གི་སྒོ་ཙུམ་མེ་བྱའོ། །སྡོད་པའི་ཚེ་རྐང་པའི་རྟིང་པས་རྡོ་རྗེའི་རྩ་བར་གནས་པས་སོ། །འཆག་པའི་ཚེ་རྟིང་པ་ཡང་རྒྱུ་ཞབས་སུ་བསྐུམས་ལ་སྟོད་བསྲུབས་དང་དབུགས་བརྔམས་(རྔམ་)པ་ལན་གཉིས་ལན་གསུམ་བྱའོ། །ཉལ་བའི་དུས་སུ་གན་རྐྱལ་དུ་མི་རུང་གིས་(གི་)ཞོགས་ཕབ་དང་པུས་བྲང་དུ་ཀུམ་མེ་ཉལ་བར་བྱའོ། །སྤྱོད་ལམ་དེ་ལྟར་རྒྱུན་དུ་བྱ། མན་ཆོད་ཁྱིའུ་གསུམ་ལ། དེ་ནས་མིང་བསྐྱེད་པ་བར་པ་ཕྱུངས་པ་བཏང་ངོ་། །ཡང་འདིའི་སྔོན་དུ་འཁུར་བ་གང་རྔུབ་ལས་བསྲུབ་ཅིང་ཁའི་བ་ཚ་ལ་སོགས་པའི་རྐྱེན་སྦྱངས་ཏེ། ལྕེ་བཞར་ལ་འཁུར་བ་བཞིབས་
1-1-213b
པ་ཧག་ཅེས་བོར་རོ། །དེ་ལྟར་ལན་གསུམ་བྱའོ། །མདང་ནས་མི་བསྐྱོད་པས་གཤེར་བའི་ལས་ལ་གཏུམ་ཀྱང་རུང་། སྦངས་ཀྱང་རུང་སྟེ། ཨ་རུ་ར་རྡོག་པ་ཅིག་(ཞིག་)ཕར་ནམ་ནེམ་ཙམ་བྱས་ལ་དེ་དང་དྲིན་ཆེན་དང་། རྒྱུད་བ་གསུམ་ཆག་ཕྲན་ལ་བཏུམས་པ་མི་བསྐྱོད་པས་གཤེར་བར་བྱས་ནས་བཙིར་བྱའོ། །ཡང་ནེམ་ནེམ་བྱས་ཤིང་སྔ་མ་ལྟར་མི་བསྐྱོད་པས་བགོས་ནས་སླར་ཡང་བཙིར་བ་འདི་ལ་ལན་གཉིས་གསུམ་གྱི་བར་དུ་བྱའོ། །དེར་སྔར་ནས་བཤམས་པའི་བུ་མོ་གཞོན་ནུ་མ་དང་འདོད་ཆགས་སྤྱད་པའི་ཁུ་བ་རས་བལ་ལ་སྤག་ཏེ(སྟེ)། དེ་ཡང་ཉུག་ཙམ་བཅུག་ལ་བཙིར་བར་བྱའོ། །དེ་ཁལ་མའི་ཟ་མ་ཏོག་ཏུ་བླུགས་ལ་ཐོ་རངས་དབུགས་གང་ནས་རྒྱུ་བའི་སྣས་བཏུང་ངོ་། །ཀླད་པས་དཀྱིལ་དུ་སོང་བར་བསམ་མོ། །དེ་ནས་དཀྱིལ་ཀྲུང་བཅའ། ལག་མཐིལ་གཉིས་པུས་མོ་ལ་དགབ། ཀ་ར་ན་བྱ། རྒྱ་མཚོ་དྲག་ཏུ་བསྐྱེད་ལ་ལག་གཡས་སུ་གསུམ། གཡོན་དུ་གསུམ་བྱ། འོག་སྒོ་བསྡམས། རྒྱུ་ཞབས་བསྐུམ། རླུང་གི་ཕོ་བསྐང་ལ་སྟོང་བསྲུབ་བྱ། ཁ་ནའི་རླུང་བསྡམས། སྟེང་སྒོ་སྣ། བུམ་པ་ཅན་ཐུབ་ཚད་བསྡམས་པ་ལན་གསུམ་བྱའོ། །དེ་ནས་གཡས་ཀྱི་ཕྱོགས་སུ་བལྟ་བས་དམ་ཚིག་གི་ཕྱག་རྒྱ་བཅིང་ལ། དབུགས་རྔུབ་པ་དང་བཅས་པ། ཁ་ཡང་དལ་བུས་བཅུད་ལ། གཡས་སུ་བཅུད་དོ། །དེ་ལྟར་གཡས་སུ་གཉིས་ལན་གསུམ་གྱི་བར་དུ་བྱའོ། །དེ་བཞིན་དུ་གཡོན་དུ་ཡང་ལན་གསུམ་དུ་བྱའོ། །ཁྲག་སྦྱང་བའི་ཆོ་ག་ནི། མགོ་བོ་གཡས་ནས་ལན་གསུམ་བསྐོར་རོ། །དེ་བཞིན་དུ་གཡོན་ཡང་ངོ་། །དེ་ནས་གཡས་སུ་གཉིས་སྤྲུག །གཡོན་དུའང་གཉིས་སྤྲུག་གོ། །རྟགས་ཨོ་ལ་འདུད་པ་མེད་པར་འགྲོའོ། །དེ་ལྟར་ཟླ་བ་དྲུག་ཏུ་སྤྱད་དེ། ཕྱི་ནས་ཟླ་བ་ཕྱེད་ཕྱེད་བཞིན་ཕོགས་ཏེ་སྤྱད་པས་ཆོག་གོ། །འདི་བརྟེན་པའི་མཐུ་གྲུབ་ན། ནད་མཐའ་དག་ལས་གྲོལ་
1-1-214a
བ་དང་། སྐྲ་དཀར་དང་གཉེར་མ་སེལ་བ་དང་། ཚེ་ཉི་ཟླ་དང་མཉམ་པར་འགྱུར་ཏེ། འདི་ཙམ་གྱིས་རྒ་བ་དང་། ན་བ་དང་། འཆི་བ་འཆིང་བར་འགྱུར་རོ། །ཨྠྀི།། །།སེམས་སྒྲུབ་པ་ནི། རྩ་དང་། རླུང་དང་། བྱང་ཆུབ་ཀྱི་སེམས་སྐྱེ་བ་འཆིང་ངོ་། །རྩ་བཅིང་བ་ནི། ལུས་དང་ངག་དང་སེམས་ཀྱི་གཡེང་བ་ཐམས་ཅད་སྤངས་ནས། གནས་བླ་ཁབ་ཅན་ནམ། གལ་ཏེ་མ་རྙེད་ན་གྲིབ་ཕྱོགས་སུ་ཁ་བལྟས་ལ། སྣ་རྩེ་འབའ་ཞིག་ལ་སེམས་གཏད་དེ་མིག་མ་འགྱུར་བར་བྱའོ། །དེ་ལྟར་ཐུན་ཚོད་ལ་ཕེབས་ཀྱི་བར་སྒོམ་པ་གོམས་པ་འམ། མཐར་མིག་ན་བ་དང་། རྩུབ་པ་དང་། མཆི་མ་འབྱུང་བ་མེད་པར་ཉིན་ཐལ་ཆོད་སྣ་རྩེར་སེམས་ཟིན་ཅིང་མིག་གིས་ལྟ་བར་ནུས་ན། དེའི་ཚེ་གདོན་མི་ཟ་བར་རྩ་འབྱོངས་པ་ཆོས་ཉིད་ཡིན་ཏེ། སྣ་རྩེའི་ཐད་ཀར་སོར་བཅུ་གཉིས་ཙམ་གྱིས་དགྱེས་པའི་ནམ་མཁའ་སྟོང་སང་ངེ་བ་དེ་ཁོ་ན་ལ་ཉིན་མཚན་མེད་པར་མིག་གིས་ལྟ་ཞིང་། སེམས་སྣ་རྩེར་གཅིག་ཏུ་གཏད་དོ། །གཞན་ལ་སྟོན་ན་ཡང་སྣ་རྩེའི་ཐད་ཀ་སོར་བཅུ་གཉིས་ཙམ་གྱི་སྟེང་གི་ནམ་མཁའ་སྟོང་སང་ངེ་བ་དེ་ཁོ་ན་ལ། དཔེ་མེད་པའི་ལྟ་རྒྱུ་ཅིག་(ཞིག་)ཡོད་ཀྱིས་མ་ཡེངས་པར་ལྟོས་ཤིག་ཅེས་སྟན་(བསྟན་)ནོ། །དེ་ནི་གཉིད་ཀྱིས་ལོག་པའི་དུས་མ་གཏོགས་པ་ཐམས་ཅད་དུ་སྟོང་སང་ངེ་བ་དེ་ཉིད་ལ་བལྟས་ན། དཔེ་མེད་པའི་ལྟ་རྒྱུ་སྲིད་པ་གསུམ་གསལ་བ་དེ་མཐོང་བར་འགྱུར་རོ། །མཐོང་ནས་ཀྱང་དེ་ལ་བསམ་གཏན་རྩེ་གཅིག་པ་དེས་ནི། ཆོས་ཉིད་དོན་དམ་པའི་རྟོགས་པ་མི་རྟོག་པའི་ཡེ་ཤེས་སྐྱེས་སྟེ(ཏེ)། འདི་ནི་རྩ་བཅིང་བའི་ཆོ་གའི་མཆོག་ཡིན་ནོ། །རླུང་བཅིང་བ་ནི། གནས་དགའ་ཞིང་བདེ་བར། རང་གི་འཆག་ས་ལ་སོགས་པ་གོང་ནས་རྒྱུས་ཚུད་བཅུག་ལ། བྱ་བ་ཐམས་ཅད་ཉེ་གཡོག་
1-1-214b
ལ་བསྐོས་ལ། རང་མིག་མི་བདེ་བར་བརྫུས་ཏེ། དེ་ཡི་ཚེ་མིག་གི་འབྲས་བུ་གོང་དུ་གྱེན་དུ་བཟློག་ལ། སྨིན་སྤྲག་དུ་(ཏུ་)སེམས་མུ་ཏིག་གི་རྡོག་མ་ཙམ་ལ་གཏད་དེ་བལྟའོ། །གཡས་གཡོན་དུ་ཟུར་གྱིས་མི་ལྟ་སྟེ། སྣ་རྩེར་ཡང་མི་ལྟའོ། །ཆོ་ག་གལ་ཆེ་ན་ཡང་སྟོང་སང་ངེ་བ་དེ་མ་ཤོར་བར། ལྟག་པ་དགྱེ་ལ་ཁ་དང་སྐྱེ་ལུས་བཅུ་བས་འོལ་ལེ་ཙམ་དུ་བལྟ་སྟེ། གཟུགས་གང་ལ་ཡང་གསལ་པོར་མི་ལྟའོ། །[ཐ་ན་འཆག་པའི་འགྲོ་ལམ་ཡང་གསལ་པོར་མི་ལྟའོ། །[ཐ་ན་འཆག་པའི་འགྲོ་ལམ་ཡང་གསལ་པོར་མི་ལྟའོ། །དེ་ཙམ་གྱིས་སྟེང་གི་རླུང་འགག་པར་འགྱུར་བ་]དེ་ཙམ་གྱིས་སྟེང་གི་རླུང་འགག་པར་འགྱུར་བ་]འདི་ནི་ངེས་པ་སྟེ། སེང་གེ་རྣམ་གྲོལ་གྱི་ཕྱག་རྒྱས་བཙན་ཐབས་སུ་དགག་པའི་སྲོག་དང་རྩོལ་བར་བྱའོ། །འདི་ནི་རླུང་བཅིང་བའི་ཐབས་ཀྱི་མཆོག་ཡིན་ནོ། །བྱང་ཆུབ་ཀྱི་སེམས་བཅིང་བ་ནི། མུ་ཏྲ་དང་སྦྱོར་བའི་ཆོ་ག་ལས། སེམས་ནོར་བུའི་རྩེར་སོན་པ་དང་། སྔར་གྱི་སྣ་རྩེའི་སྟོང་པ་ལ་ལྟ་བས་མི་གཡོ་བར་བྱས་པས་འཛག་པ་འགོག་ནུས་ཏེ། བདེ་བ་ཆེན་པོ་ལུས་ཐམས་ཅད་ལ་ཁྱབ་པའི་བར་དུའོ། །ལྷན་ཅིག་སྐྱེས་པའི་ཡེ་ཤེས་མངོན་སུམ་དུ་བྱེད་པར་འགྱུར་རོ། །འདི་ནི་སེམས་གཡོ་བ་མེད་པར་འཆིང་བའི་མཆོག །ཨུ་རྒྱན་གྱི་རྣལ་འབྱོར་མ་ལྷན་ཅིག་སྐྱེས་གྲུབ་མ་རྣམས་ཀྱིས་བཀའ་བཀྲོལ་ཏེ་གདམས་པ། རིག་པའི་སྐྱེས་བུ་གྲུབ་པ་སློབ་དཔོན་ཆེན་པོ་ཏིལ་རྡུལ་ཞབས་ཀྱིས་ཞལ་སྔ་ནས་ལྔ་རིག་པའི་པཎྜི་ཏ་ཆེན་པོ་གྲུབ་པ་ཐོབ་པ་དཔལ་ནཱ་རོ་པ་ལ་རྗེས་སུ་གནང་བ། སྐྱེས་མཆོག་མར་པ་ལོ་ཙྪ་བ་ཆེན་པོའི་ཞུས་ཆོས་ཐམས་ཅད་ཀྱི་བཅུད་ཕྱུང་བ་ཌ་ཀིས་བྱིན་གྱིས་བརླབས་ཀྱིས་དངོས་གྲུབ་ཀྱི་སྣང་བ་ཐོབ་པའི་རྣལ་འབྱོར་དབང་ཕྱུག་དཔལ་གཞད་(བཞད་)པ་རྡོ་རྗེས་ཐུགས་ཉམས་སུ་མྱོང་བར་བྱས། སྲས་ཀྱི་ཐུ་བོ་རྗེ་རས་ཆུང་པ་དང་། མཉམ་མེད་རིན་པོ་ཆེ་ལས་བརྒྱུད་པའི་སྙིང་པོ་ལྟ་བུ་ཡིན་ནོ། །སྙན་ནས་སྙན་དུ་རྒྱུད་(བརྒྱུད་)པ་
1-1-215a
ཞལ་ནས་ཞལ་གདམས་སུ་བྱོན་པ། ཐུགས་ནས་ཐུགས་ཉམས་སུ་བསྡད་པའི་ཆོས་སོ།། །།
